ТҮРКПА Катчылыгынын Хожалы кыргынын эскерүү күнүнө карата кайрылуусу

Арадан 33 жыл өтсө да, Хожалы кыргыны унутулбай, азабы дагы деле басылган жок. Адамзатка каршы бул коркунучтуу кылмышта мыкаачылык менен өлтүрүлгөн ар бир бейкүнөө жарандын элеси жүрөгүбүздө айыкпаган жара бойдон калууда. 1992-жылдын 25-февралынан 26-февралына караган түнү Армениянын куралдуу күчтөрү Азербайжандын жарандарына жасаган ойго келбеген мыкаачылыктын кесепетинен Азербайжандын жүздөгөн бейкүнөө жараны аёосуз өлтүрүлгөн. Курман болгондордун арасында аялдар, балдар жана карылар болгон. Ошол каргашалуу түнү Хожаланын көптөгөн тургундары барымтага алынган. ТҮРКПА үй-бүлөсү катары, биз Хожалы кыргыны курмандыктарынын ыйык элесин эскерип, алардын түбөлүк тынчтыгын тилейбиз. Бул мүмкүнчүлүктөн пайдаланып, Азербайжан эли жана мамлекетине болгон чексиз тилектештигибизди дагы бир жолу билдиребиз.