2024 жылғы 2 мамырда Бас хатшы Мехмет Сүрейя Эр Бакуде өткен Алтыншы Дүниежүзілік мәдениетаралық диалог форумы аясында ұйымдастырылған парламентаралық конференцияға қатысты.

Іс-шара «Мәдени мұраны қорғаудағы заң шығарушы органның рөлі мен озық тәжірибесі» тақырыбы аясында өтті. Конференцияға спикерлер, вице-спикерлер мен парламент мүшелері, үкімет өкілдері, сондай-ақ халықаралық ұйымдардың өкілдері қатысты. Әзербайжан Республикасы Милли Меджлисінің Төрайымы Сагиба Гафарова өзінің кіріспе сөзінде конференцияның мәдениетаралық диалогты ілгерілету тұрғысынан маңыздылығын атап өтті. Ол мұраны сақтау және ұрпаққа жеткізу үшін тиісті институционалдық және заңнамалық тәсілдер қажет екенін білдірді.

Іс-шара қатысушы делегациялар басшылары мен өкілдерінің сөз сөйлеуімен жалғасты. Қатысушылар өздерінің озық тәжірибелерімен бөлісті және мәдени мұраны қорғаудың және оның инклюзивтілігін ілгерілетудің түрлі аспектілеріне тоқталды.

Конференцияда Бас хатшы Мехмет Сүрейя Эр де сөз сөйледі. Бас хатшы конференция барысындағы талқылаулар мәдени әртүрлілікті, толеранттылық құндылықтарын, өзара құрмет пен түсіністікті ілгерілетуге ықпал ететініне сенім білдірді. Мәдени мұраны қорғаудың құқықтық және саяси негіздерін қалыптастыруда, оны келешек ұрпаққа жеткізуде парламенттердің маңызды және ерекше рөліне тоқталды. Мәдени мұраны ілгерілету, мәдени ынтымақтастық пен мәдениетаралық диалогты нығайтудағы парламенттік дипломатияның рөлі туралы айта келе, Бас хатшы ТҮРКПА аясындағы ынтымақтастық тетіктері арқылы мәдени мұра саласында атқарылып жатқан жұмыстар туралы хабардар етті.