2024-жылдын 2-майында Башкы катчы Мехмет Сүрейя Эр Бакуда өткөн Алтынчы Дүйнөлүк маданияттар аралык диалог форумунун алкагында уюштурулган Парламенттер аралык конференцияга катышты.
Иш-чара “Маданий мурастарды коргоодо мыйзам чыгаруу органынын ролу жана алдыкы тажрыйбасы” деген теманын алдында өттү. Конференцияга спикерлер, вице-спикерлер, парламентарийлер, өкмөт жана эл аралык уюмдардын өкүлдөрү катышты.
Өзүнүн ачылыш сөзүндө Азербайжан Республикасынын Милли Межлисинин Төрайымы Сахиба Гафарова маданияттар аралык диалогду өнүктүрүү көз карашынан алганда конференциянын маанилүүлүгүн баса белгиледи. Ал белгилегендей, мурастарды сактоо жана муундарга өткөрүп берүү үчүн туура институттук жана мыйзамдык механизмдер керек.
Иш-чара катышуучу делегациялардын жетекчилеринин жана өкүлдөрүнүн сөз сүйлөөсү менен уланды. Катышуучулар өздөрүнүн мыкты тажрыйбалары менен бөлүшүп, маданий мурастарды коргоонун жана анын инклюзивдүүлүгүн илгерилетүүнүн ар кандай аспектилерине токтолушту.
Конференциянын жүрүшүндө Башкы катчы Мехмет Сүрейя Эр да сөз сүйлөдү. Башкы катчы конференциянын жүрүшүндөгү талкуулар маданий көп түрдүүлүктү, толеранттуулук баалуулуктарын, өз ара урматтоо жана түшүнүүчүлүктү илгерилетүүгө жардам берерине ишенимин билдирди. Ал маданий мурастарды коргоонун жана аны келечек муундарга жеткирүүнүн укуктук жана саясий негиздерин калыптандырууда парламенттердин маанилүү жана өзгөчө ролун баса белгиледи. Маданий мурастарды илгерилетүү, маданий кызматташтыкты жана маданияттар аралык диалогду чыңдоодо парламенттик дипломатиянын ролуна токтолгон Башкы катчы ТҮРКПАнын алкагында кызматташуу механизмдери аркылуу маданий мурастарды жайылтуу жаатында жүргүзүлүп жаткан иштер тууралуу маалымат берди.
