Түркияның Ұлы Ұлттық Жиналысы ұйымдастырған ТҮРКПА Кеңесінің он екінші отырысы 2023 жылы 28 сәуірде Анкарада өтті.
Кеңес мүшелері – Әзербайжан Республикасы Милли Меджлисінің Төрайымы Сагиба Гафарова, Қазақстан Республикасы Парламенті Мәжілісінің Төрағасы Ерлан Қошанов, Қырғыз Республикасы Жогорку Кенешінің Төрағасы Нурланбек Шакиев, Түркия Ұлы Ұлттық Жиналысының Спикері Мұстафа Шентоп, сондай-ақ Бас хатшы Мехмет Сүрейя Эр отырысқа қатысты. Кездесу барысында ТҮРКПА төрағалығын Қырғыз Республикасының Жогорку Кенешінен Түркияның Ұлы Ұлттық Жиналысына тапсыру рәсімі өтті. Парламент басшылары кіріспе сөз сөйледі. ТҮРКПА-ның Іс басындағы Төрағасы Мұстафа Шентоп өзінің әріптесіне алғысын білдіріп, Қырғыз Республикасы Жогорку Кенешінің төрағалық ету кезінде өткен кезеңдегі жұмысын жоғары бағалады.
Кеңес күн тәртібіндегі мәселелерді талқылап, бірқатар маңызды шешімдер қабылдады. Кеңес ТҮРКПА-ның «Әлеуметтік, мәдени және гуманитарлық мәселелер жөніндегі комиссиясының» атауын «Білім, мәдениет, әлеуметтік және гуманитарлық мәселелер жөніндегі комиссия» деп өзгерту туралы шешім қабылдады. Солтүстік Кипр Түрік Республикасының Ассамблеясына және Қосылмау Қозғалысының Парламенттік Желісіне ТҮРКПА-да бақылаушы мәртебесі берілді. ТҮРКПА Қосылмау Қозғалысының Парламенттік Желісінде бақылаушысы мәртебесін алуға өтініш беру туралы шешім де қабылданды.
Ассамблея Кеңесі ТҮРКПА комиссияларының төрағасы мен төраға орынбасарының кандидатураларын бекітіп, Қоршаған орта, табиғи ресурстар және денсаулық сақтау жөніндегі комиссияның хатшысын сайлады.
