2023 жылғы 30-31 қаңтарда ТҮРКПА делегациясы Біріккен Ұлттар Ұйымының Терроризмге қарсы күрес басқармасы (БҰҰ ТҚКБ), ЕҚЫҰ Парламенттік Ассамблеясы және Дохадағы Катар Мемлекетінің Шурасы бірлесіп ұйымдастырған Парламенттік Ассамблеялардың үшінші Терроризмге қарсы Үйлестіру Кеңесіне және шекара қауіпсіздігі жөніндегі Парламенттік саяси диалогқа қатысты. Іс-шараға 16 халықаралық Парламенттік Ассамблеяның өкілдері қатысып, терроризмге қарсы іс-қимылдың бар тенденциялары мен күш-жігерін бірлесіп шолуға ықпал етті.

Алғы сөздерінде Катар мемлекетінің Шура Кеңесінің Спикері Хасан бен Аддулла Әл-Ганим мырза, Біріккен Ұлттар Ұйымының Терроризмге қарсы күрес басқармасы Директорының орынбасары Мауро Медико мырза және ЕҚЫҰ Парламенттік Ассамблеясының Вице-президенті және Терроризмге қарсы іс-қимыл жөніндегі Арнайы комитетінің Төрағасы Рейнхольд Лопатка мырза терроризм жалпы күн тәртібіндегі өзекті мәселе деп атады. Табысқа барлық тараптар ынтымақтастық негізінде бірлесіп әрекет еткенде қол жеткізуге болатындығы атап өтіліп, осы тұрғыда Парламенттік Ассамблеялардың маңызы көптеген тұстарда көрінеді деп айтылды.

Парламентаралық Одақ, Араб Парламенті, Африка Парламенттік Одағы, Еуропа Кеңесінің Парламенттік Ассамблеясы, Латын Америкасы мен Кариб теңізі Парламенті, Жерорта теңізі Парламенттік Ассамблеясы және Қара теңіз экономикалық ынтымақтастығы Парламенттік Ассамблеясы сияқты әртүрлі аймақтық және жаһандық Парламенттік Ассамблеялардың өкілдері ТҮРКПА-мен бірге басым бағыттарды, халықаралық құқықтық базаны жақсарту мүмкіндіктерін түсіну және мүмкін болатын болашақ бірлескен бастамаларды талқылады.

Отырыста сөз алған ТҮРКПА делегациясы қатысушыларды Ассамблеяның миссиясы мен мақсаттары, сондай-ақ осы мәселе бойынша оның шеңберінде жүргізілген жұмыстар туралы хабардар етті.

Бас хатшының орынбасары Фуад Алакбаров пен Комиссия хатшысы Кадир Яман екі күндік іс-шараның аясында екіжақты кездесулер өткізді.