ТҮРКПА Бас хатшысының орынбасары АӨСШК дөңгелек үстеліне қатысты

2026 жылғы 17 маусымда Астана қаласында ТҮРКПА Бас хатшысының орынбасары Талғат Адуов Азиядағы өзара іс-қимыл және сенім шаралары жөніндегі кеңес ұйымдастырған «Қауіпсіз және өзара байланысты Азия үшін синергияны нығайту» тақырыбындағы Азиядағы өңірлік ұйымдардың атқарушы құрылымдарының дөңгелек үстеліне қатысты. Іс-шара АӨСШК Хатшылығының құрылғанына 20 жыл толуына орай өткізілді.

Жоғары деңгейдегі дөңгелек үстелге АӨСШК-ке мүше мемлекеттерден өңірлік ұйымдар хатшылықтары мен атқарушы құрылымдарының басшылары, БҰҰ өкілдері, сондай-ақ талдау орталықтарының сарапшылары қатысты. Талқылаулар барысында көпжақты ынтымақтастықтың өзекті сын-қатерлері, БҰҰ-ның жаһандық-өңірлік өзара байланысы, сондай-ақ өңірлік атқарушы құрылымдардың өзгеріп отырған басымдықтары қарастырылды.

Үшінші сессияда сөз сөйлеген Талғат Адуов ТҮРКПА-ның институционалдық басымдықтары мен өз мандатын іске асырудағы практикалық тәсілдерін таныстырып, Ұйымның түркі мемлекеттері арасындағы парламенттік ынтымақтастықты, ортақ құндылықтар мен интеграциялық үдерістерді ілгерілетудегі рөлін атап өтті. Ол ТҮРКПА мен АӨСШК арасында нәтижелі байланыстар қалыптасқанын, ортақ басымдықтар бойынша пікір алмасулар жүргізіліп келе жатқанын және өңірде көпжақтылық рухын нығайтуға бағытталған күш-жігерге тараптардың өзара қолдау көрсетіп отырғанын атап өтті.

Сапар барысында ТҮРКПА Бас хатшысының орынбасары Талғат Адуовке Комиссия хатшысы әрі Әйел парламентшілер тобының атқарушы хатшысы Айнура Абуталибова бірге жүрді.