ТҮРКПА Дайыны жок жоголгон адамдар маселеси боюнча кызматташтыкты чыңдоого арналган эл аралык конференцияга катышты

2026-жылдын 30-июнунда ТҮРКПАнын Башкы катчысынын орун басары Талгат Адуов Азербайжан Республикасынын Согуш туткундары, барымтадагылар жана дайынсыз жоголгон жарандар боюнча мамлекеттик комиссиясы (STATCOM) тарабынан Дайынсыз жоголгон адамдар боюнча эл аралык комиссия (ICMP) менен биргеликте Азербайжан Республикасынын Баку шаарында уюштурулган «Дайынсыз жоголгон адамдар маселесин чечүүдө кызматташтыкты чыңдоо жана заманбап ыкмаларды өнүктүрүү» аттуу эл аралык конференцияга катышты.

Конференция гуманитардык маселелер боюнча кызматташтыкты чыңдоонун жана дайынсыз жоголгон адамдарды аныктоо жаатындагы заманбап тажрыйбаларды бөлүшүүнүн алкагында өткөрүлдү. Иш-чарага жогорку мамлекеттик кызмат адамдары, Азербайжан Республикасынын Милли Межлисинин депутаттары, эл аралык уюмдардын өкүлдөрү жана тиешелүү тармактардын эксперттери катышты.

Мамлекеттик комиссиянын төрагасынын орун басары Газанфар Ахмадов алып барган конференциянын жүрүшүндө дайынсыз жоголгон адамдар боюнча жаңыланган маалыматтар сунушталды. Карабах жаңжалдарына байланыштуу миңдеген жарандар дайынсыз жоголгон катары катталгандыгы белгиленди. Комиссия ДНК-технологияларын жана соттук-эксперттик изилдөөлөрдү колдонуу аркылуу эксгумациялоо жана өздүгүн аныктоо иштеринде жетишилген ийгиликтер тууралуу маалымдап, ошол эле учурда көп сандаган адамдардын тагдыры дагы эле белгисиз бойдон калууда экенин билдирди.

Иш-чара эл аралык кызматташтыкты чыңдоо, соттук-эксперттик жана илимий мүмкүнчүлүктөрдү кеңейтүү, ошондой эле дайынсыз жоголгон адамдар маселесин чечүүдө заманбап ыкмаларды өнүктүрүү боюнча пикир алмашуу менен уланды.