ТҮРКПА Биринчи Түркологиялык конгресстин 100 жылдыгына арналган көргөзмөгө катышты

2026-жылдын 2-июлунда ТҮРКПАнын Башкы катчысынын орун басарынын милдетин аткаруучу Бектур Баказаков Баку шаарында өткөн Биринчи Түркологиялык конгресстин 100 жылдыгына арналган «Баку. 1926: Тил, ой жүгүртүү, биримдик» аттуу көргөзмөнүн ачылыш аземине катышты.

Азербайжан Республикасынын Маданият министрлигинин колдоосу менен Азербайжандын Улуттук тарых музейи жана Түрк маданияты жана мурасы фонду тарабынан биргелешип уюштурулган көргөзмө Биринчи Түркологиялык конгресстин тарыхый маанисин, түрк элдеринин жалпы илимий жана маданий мурасын, ошондой эле түркологиянын өз алдынча илимий тармак катары калыптануу жана өнүгүү тарыхын чагылдырууну максат кылат.

Көргөзмө 1926-жылы өткөн Биринчи Түркологиялык конгресс, тил жана алфавит реформалары, түрк элдеринин жалпы маданий мурасын сактоо жана жайылтуу сыяктуу түрк дүйнөсүнүн тарыхындагы маанилүү этаптарды чагылдыруу менен бирге, көз карандысыздык мезгилиндеги түрк дүйнөсүнүн кайрадан интеграциялануу жараянын да чагылдырат.

Көргөзмөгө Азербайжандын Улуттук тарых музейинин, Азербайжан Республикасынын Улуттук архив башкармалыгынын жана профессор Адалат Тахирзаденин жеке архивинин фонддорунда сакталган сейрек архивдик документтер, Конгресстин расмий материалдары, тарыхый сүрөттөр жана башка баалуу экспонаттар коюлган.