Парламенттер аралык биримдиктин (ПАБ) Куралдуу кагылышуулар учурунда айлана-чөйрөнү коргоо маселеси боюнча вебинары

ТҮРКПАнын Айлана-чөйрө, жаратылыш ресурстары жана саламаттыкты сактоо боюнча комиссиясынын катчысы Айнура Абуталибова байкоочу макамында эл аралык гуманитардык укук (ЭГУ) боюнча парламенттик вебинарлар сериясынын «Куралдуу кагылышуулар учурунда жаратылыш чөйрөсүн коргоо: Парламенттер эл аралык гуманитардык укукту ишке ашыруу аркылуу айлана-чөйрөнү коргоону кантип камсыздай алат?» аттуу экинчи вебинарына катышты.

Вебинар Парламенттер аралык биримдиктин (ПАБ) Эл аралык гуманитардык укукту урматтоого көмөктөшүү боюнча комитети тарабынан Эл аралык Кызыл Чырым комитетинин (ЭКЧК) колдоосу менен уюштурулуп, аны Польша Республикасынын Сенатынын сенатору, ПАБдын Вице-президенти жана ПАБдын Эл аралык гуманитардык укукту урматтоого көмөктөшүү боюнча комитетинин мүчөсү Габриэла Моравска-Станецка алып барды.

Эл аралык гуманитардык укук жана экологиялык саясат жаатындагы эксперттердин башын кошкон вебинар куралдуу кагылышуулардын айлана-чөйрөгө тийгизген токтоосуз жана узак мөөнөттүү кесепеттерине, ошондой эле жаратылыш чөйрөсүн коргоону камсыз кылуу максатында эл аралык гуманитардык укукту ишке ашырууну чыңдоодо парламенттердин ролуна арналды.

Вебинарга ошондой эле Азербайжан Республикасынын Милли Межлисинин Төрайымы Сахиба Гафарова катышып, сөз сүйлөдү. Ал куралдуу кагылышуулар учурунда жаратылыш чөйрөсүн коргоо экологиялык маселе гана болбостон, гуманитардык, укуктук жана коопсуздук жагынан да өзгөчө мааниге ээ экендигин белгиледи.

Ал ошондой эле куралдуу кагылышуулар экосистемаларга, биологиялык ар түрдүүлүккө, суу ресурстарына жана айыл чарба жерлерине узак мөөнөттүү зыян келтирерин баса белгилеп, мындай кесепеттер туруктуу өнүгүүгө доо кетирип, келечек муундардын жашоо-шарттарына терс таасирин тийгизерин белгиледи.