ТҮРКПА мен DTİK Бакуде бірлескен кездесу өткізді

2026 жылғы 11 маусымда ТҮРКПА Халықаралық хатшылығы Дүниежүзілік түрік іскерлік кеңесінің (DTİK) Әзербайжандағы өкілдігімен бірлесіп, Түркия Республикасының Әзербайжан Республикасындағы Елшілігінің қолдауымен Бакудегі Four Seasons қонақүйінде бірлескен кездесу өткізді.

Бірінші Түркология съезінің 100 жылдығын атап өту аясында ұйымдастырылған іс-шара түркі әлемінің мәдени мұрасын және экономикалық ынтымақтастық жөніндегі пайымын ілгерілетуге бағытталды. Кездесудің негізгі мақсаты түркі мемлекеттері арасындағы іскерлік ынтымақтастықты, экономикалық және мәдени интеграцияны нығайту, сондай-ақ өзара ықпалдастықты одан әрі кеңейту болды. Іс-шараға Түркі мемлекеттерінің дипломатиялық миссияларының басшылары, мемлекеттік органдардың өкілдері, Әзербайжанда қызмет атқарып жүрген түрік кәсіпкерлері және үкіметтік емес ұйымдардың өкілдері қатысты.

Іс-шараның ашылуында DTİK-тің Әзербайжандағы өкілі Барыш Алтыпармақ қатысушыларға ризашылығын білдіріп, DTİK-тің 90 елде жұмыс істейтінін атап өтті. Ол ұйымның Түркі мемлекеттері ұйымының 2040 жылға дейінгі пайымына сәйкес мүше мемлекеттер арасындағы әлеуметтік және экономикалық ынтымақтастықты дамытуға үлес қосып келе жатқанын жеткізді. Сонымен қатар, ол түркі мемлекеттерінің «Бірлікте күшіміз арта түседі» қағидаты өңірлік ұстаным шеңберінен шығып, жаһандық геосаяси шындыққа айналғанын атап өтті.

Өз сөзінде ТҮРКПА Бас хатшысы, Елші Рамиль Гасан Бірінші Түркология съезінің 100 жылдығын атап өту туралы шешімнің маңыздылығына тоқталды. Аталған бастама Әзербайжан Республикасының Президенті Мәртебелі Ильхам Әлиев тарапынан көтеріліп, кейіннен Түркі мемлекеттері ұйымының саммитінде Түркі мемлекеттері басшылары тарапынан қабылданған болатын. Осы тұрғыда Рамиль Гасан ТҮРКПА, DTİK және Түркия Республикасының Әзербайжандағы Елшілігі бірлесіп ұйымдастырған аталған іс-шараның айрықша маңыздылығын атап өтті. Сондай-ақ ол Түркі мемлекеттері арасындағы қатынастарды нығайтудағы Түркі мемлекеттері Парламенттік Ассамблеясының (ТҮРКПА) рөлі мен стратегиялық маңызын айрықша атап өтіп, Ассамблеяның заңнамаларды үйлестіру, ортақ заңнамалық нормаларды қабылдау, сондай-ақ Түркі мемлекеттері ұйымы қабылдаған маңызды шешімдерді ұлттық заңнама деңгейінде ратификациялау және парламенттік мақұлдауға жәрдемдесу бағыттарында атқарып отырған әрі алдағы уақытта атқара алатын рөліне назар аударды.

Өз кезегінде Түркия Республикасының Әзербайжан Республикасындағы Төтенше және Өкілетті Елшісі, профессор, доктор Бирол Ақгүн Түркі мемлекеттері Парламенттік Ассамблеясының (ТҮРКПА) қызметіне ерекше мән берілетінін атап өтіп, оның Түркі мемлекеттері арасындағы ынтымақтастық пен байланыстарды нығайтуға қосып отырған үлесін жоғары бағалады. Ол қазіргі жаһандық геосаяси және геоэкономикалық өзгерістер жағдайында түркі әлемінің стратегиялық маңызы арта түсіп отырғанын, ал Түркі мемлекеттері ұйымы аясындағы ынтымақтастық форматы XXI ғасырға арналған келешекке бағдарланған серіктестік пайымын білдіретінін атап өтті.

Қатысушылар Түркі мемлекеттері арасындағы ынтымақтастықты одан әрі дамыту және байланыстарды нығайту перспективалары жөнінде пікір алмасты.

Бағдарлама аясында әзербайжандық композитор әрі пианист Туран Манафзаденің концерті және өнер көрмесі ұйымдастырылды.