«Халыққа экологиялық білім беру және ағарту туралы» модельдік заңын әзірлеу бойынша талқылау аяқталды

ТҮРКПА-ның Қоршаған орта, табиғи ресурстар және денсаулықты сақтау жөніндегі комиссиясы аясында «Халыққа экологиялық білім беру және ағарту туралы» модельдік заң жобасын әзірлеу бойынша Сарапшылар тобының отырыстары аяқталды. 2025 жылғы 31 қаңтарда және 21 ақпанда сәйкесінше жиналған мүше мемлекеттердің өкілдерінен тұратын Сарапшылар тобының онлайн отырыстары өтті. «Халыққа экологиялық білім беру және ағарту туралы» модельдік заң жобасы ТҮРКПА-ның 2023-2028 жылдарға арналған Стратегиялық жол картасына сәйкес әзірленді. Құжат Әзербайжан, Қазақстан, Қырғызстан және Түркияның ұлттық заңнамалық жүйелерінің іргелі құқықтық базасына негізделген. Осылайша, осы құжатты әзірлеу барысында мүше мемлекеттердің қолданыстағы заңдарына, әртүрлі елдердегі қолданыстағы ұқсас заңдарға, сондай-ақ басқа да нормативтік-құқықтық құжаттарға қатысты тәжірибе зерделенді. Қоршаған ортаны қорғау және табиғи ресурстарды тиімді пайдалану бойынша мінез-құлық нормалары мен арнайы білімдерін қалыптастыруға бағытталған тәжірибе жинақтау және оқыту үдерісінің маңызды құқықтық құралы ретінде модельдік заң жобасын әзірлеу тиісті саладағы бар құқықтық олқылықтарды жоюға бағытталған. Мүше мемлекеттер мен ТҮРКПА Хатшылығының өкілдерінің қатысуымен өткен Сарапшылар тобының отырыстарында тараптар модельдік заң жобасы бойынша пікір алмасып, ұсынымдар мен ұсыныстар берді. Әзербайжан Республикасының Милли Меджлисі әзірлеген модельдік заңның соңғы жобасы Комиссияның 10-шы отырысына ұсынылады. Отырыстарды Комиссия хатшысы Айнура Абуталибова жүргізді.