ТҮРКПА Жас парламентшілер тобының бесінші отырысы

2026 жылғы 19 қазанда Қырғыз Республикасының Бішкек қаласында Түркі мемлекеттерінің Парламенттік Ассамблеясының (ТҮРКПА) XV пленарлық отырысы аясында «Жастардың саяси шешімдер қабылдау үдерістеріне қатысуы және ТҮРКПА-ға мүше мемлекеттердің парламенттеріндегі жас парламентшілердің өкілдік деңгейі» тақырыбында Жас парламентшілер тобының бесінші отырысы өтті. Іс-шараға ТҮРКПА-ға мүше мемлекеттердің парламентшілері қатысты.

Отырысқа Жас парламентшілер тобының басшысы, Қазақстан Республикасы Құрылтайының депутаты Дидарбек Ділдәбек төрағалық етті. Өзінің кіріспе сөзінде Дидарбек Ділдәбек отырысты ұйымдастырғаны үшін Қырғыз Республикасының Жогорку Кеңешіне алғыс білдіріп, жас парламентшілер арасындағы ынтымақтастықты нығайтудың, жастардың саяси шешімдер қабылдау үдерістеріне белсенді қатысуын ынталандырудың, сондай-ақ ТҮРКПА-ға мүше мемлекеттер арасында тәжірибе және озық практикалар алмасудың маңыздылығын атап өтті.

Отырыс барысында Әзербайжан Республикасы Милли Мәжілісінің депутаты Анар Мамедов, Қырғыз Республикасы Жогорку Кеңешінің депутаты Бақтияр Қалпаев және Түркия Ұлы Ұлттық Мәжілісінің депутаты Эмре Чалышкан сөз сөйледі. Сондай-ақ ТҮРКПА Бас хатшысының орынбасары Мұхаммет Алпер Хаяли қатысушыларға арнап сөз сөйледі.

Қатысушылар «Жастардың саяси шешімдер қабылдау үдерістеріне қатысуы және ТҮРКПА-ға мүше мемлекеттердің парламенттеріндегі жас парламентшілердің өкілдік деңгейі» тақырыбындағы баяндама жобасын қарастырды. Аталған құжатта Әзербайжан, Қазақстан, Қырғызстан және Түркияның жастардың саяси және қоғамдық өмірге қатысуын ынталандыру жөніндегі ұлттық тәжірибелері ұсынылды. Талқылаулар барысында жастардың қатысуын қолдауға бағытталған құқықтық және институционалдық негіздер, олардың парламенттердегі өкілдігі, жастар кеңестері, тәлімгерлік бағдарламалар, сайлау мәселелері бойынша хабардарлықты арттыру бастамалары, сондай-ақ жас азаматтар мен шешім қабылдаушы тұлғалар арасындағы диалогты нығайту тетіктері қарастырылды.

Дидарбек Ділдәбек парламенттік ынтымақтастықты нығайтуда, жастардың заң шығару және саяси үдерістерге қатысуын ілгерілетуде, сондай-ақ ТҮРКПА-ға мүше мемлекеттер арасында тәжірибе мен озық практикалар алмасуға жәрдемдесуде жас парламентшілердің атқаратын рөлін ерекше атап өтті.

Отырыс барысында ұлттық парламенттердегі жастардың өкілдігін арттыру, парламенттік тәлімгерлік бағдарламаларды дамыту, жастар кеңестері мен консультативтік тетіктерді нығайту, сондай-ақ жастардың саяси және сайлау сауаттылығын арттыру жөніндегі тәжірибелер бойынша пікір алмасылды. Ұлттық парламенттердегі жастардың өкілдігі туралы салыстырмалы деректерді жинау және өзара алмасудың маңыздылығына ерекше назар аударылды. Мүше мемлекеттердің парламентшілері жас парламентшілер арасындағы тығыз ынтымақтастық, тұрақты диалог және бірлескен бастамалар жастардың саяси шешімдер қабылдау үдерістеріндегі рөлін күшейтуге, сондай-ақ ТҮРКПА шеңберіндегі парламентаралық ынтымақтастықты одан әрі дамытуға ықпал ететініне сенім білдірді.

Отырыс қорытындысы бойынша Жас парламентшілер тобы баяндама мен ұсынымдарды қабылдап, келесі отырыстың тақырыбын «Жасанды интеллект және жастар: ТҮРКПА-ға мүше мемлекеттердегі мүмкіндіктер, цифрлық қауіпсіздік және жауапты пайдалану» деп белгіледі. Топтың алтыншы отырысын ТҮРКПА-ның XVI пленарлық отырысы аясында Түркия Республикасында өткізу туралы шешім қабылданды.

Сонымен қатар тараптар 2026 жылғы 11–14 қарашада Түркия Республикасында «Ынтымақтастыққа қатысты түркілік көзқарас және жастардың рөлі» тақырыбында конференция өткізу туралы келісімге келді.

Отырыстың жұмысын Жас парламентшілер тобының атқарушы хатшысы және комиссия хатшысының міндетін атқарушы Мирлан Усенканов үйлестірді.