ТҮРКПА Ысык-Көл Шайлоо Форумуна катышты

ТҮРКПАнын Башкы катчысы Мехмет Сүрейя Эр баштаган делегациясы 2025-жылдын 26-27-июнунда Кыргыз Республикасынын Чолпон-Ата шаарында өткөн Ысык-Көл шайлоо форумуна катышты. Форум “Шайлоого катышуунун заманбап ыкмалары: теориядан практикага чейин” деген теманын алкагында өттү. Ысык-Көл шайлоо форумуна эл аралык уюмдардын, Түрк мамлекеттердин – Азербайжан, Казакстан, Кыргыз Республикасы, Түркия жана Өзбекстандын, ошондой эле Россия, Беларусия, Тажикстан, Грузия, Эстония, Молдова, Монголия жана Индиянын Борбордук шайлоо органдарынын жетекчилери жана өкүлдөрү, Кыргыз Республикасынын өкмөттүк эмес уюмдары жана мамлекеттик кызматкерлери катышты. Форум Кыргыз Республикасынын Президенти Садыр Жапаровдун иш-чаранын катышуучуларына арналган видео кайрылуусу менен башталды. Ачылыш аземине Кыргыз Республикасынын Шайлоо жана референдумдарды өткөрүү боюнча борбордук комиссиясынын төрагасы Тынчтык Шайназаров, Кыргыз Республикасынын Министрлер кабинетинин төрагасынын орун басары Эдил Байсалов, Түрк мамлекеттер уюмунун (ТМУ) Башкы катчысы Кубанычбек Өмүралиев, Көз карандысыз Мамлекеттер Шериктештигинин (КМШ) Башкы катчысы Сергей Лебедев (видео кайрылуу аркылуу), Шанхай Кызматташтык Уюмунун (ШКУ) Башкы катчысы Нурлан Ермекбаев (видео кайрылуу аркылуу), КМШнын Парламенттер аралык Ассамблеясынын Башкы катчысы Дмитрий Кобицкий, ТҮРКПАнын Башкы катчысы Мехмет Сүрейя Эр, ЕККУнун Бишкектеги Программалык кеңсесинин башчысы Алексей Рогов (видео кайрылуу аркылуу) жана БУУнун Кыргыз Республикасындагы туруктуу координатору Антье Граве сөз сүйлөштү. Башкы катчы Мехмет Сүрейя Эр өз сөзүндө шайлоо - бул башкаруу механизми гана эмес, коомдук ишенимдин чагылышы экендигин белгиледи. Жарандардын, жаштардын жана мүмкүнчүлүгү чектелген адамдардын, айрыкча аялдардын, шайлоого кеңири катышуусун инклюзивдүүлүккө өбөлгө түзүүчү маанилүү милдет катары белгилеп, Башкы катчы бул контекстте аялдарга жана жаштарга тиешелүү актуалдуу маселелерди караган, аялдардын жана жаштардын укуктарын жана мүмкүнчүлүктөрүн кеңейтүүгө көмөктөшкөн жана коомдук турмуштун бардык чөйрөлөрүнө активдүү катышкан ТҮРКПАнын Аял парламентарийлер жана Жаш парламентарийлер тобунун ролун баса белгилеп, аялдардын жана жаштардын саясий турмушка, анын ичинде шайлоого активдүү катышуусуна түрткү берүүчү фактор катары көрсөттү. Башкы катчы форумду кызматташтык, билим жана тажрыйба алмашуу үчүн абдан маанилүү платформа катары белгиледи. Ал ТҮРКПАнын Шайлоо жана референдумдарга байкоо жүргүзүү ишмердүүлүгү жөнүндө айтып, уюмдун инклюзивдүү катышууну колдоого жана демократиялык процесстерди өнүктүрүүгө болгон берилгендигин дагы бир жолу баса белгиледи. "Эл аралык шайлоо практикасын улуттук шарттарга ылайыкташтыруу" темасындагы форумдун пленардык отуруму жана "Шайлоо уюштуруучуларын окутуунун мыкты методикалары" жана "Жаштардын шайлоо процесстерине катышуусу" темасындагы тегерек столдор шайлоо процесстеринде жана алдыңкы тажрыйбаларда ар кайсы өлкөлөрдүн уникалдуу тажрыйбалары менен алмашуу үчүн баалуу мүмкүнчүлүк берди. Иш-чаранын программасында жаңыланган шайлоо жабдууларын көрсөтүү да каралды. 27-июндагы форумдун алкагындагы программанын маданий бөлүгү Ысык-Көлдүн кооз көрүнүшүнө кемеде саякаттоону камтыды. Иш-чаранын жүрүшүндө Башкы катчы Мехмет Сүрейя Эрди ТҮРКПАнын Билим берүү, маданий, социалдык жана гуманитардык маселелер боюнча комиссиясынын катчысы Айгерим Таалайбекова жана ТҮРКПА Катчылыгынын Укуктук маселелер боюнча адиси Азер Маммадов коштоп жүрүштү.