ТҮРКПА Түркі ынтымақтастығы ұйымдары Үйлестіру комитетінің 4-ші отырысына қатысты

Бас хатшы Мехмет Сүрейя Эр бастаған ТҮРКПА делегациясы 2024 жылғы 19 қаңтарда Ыстамбұлда өткен Түркі ынтымақтастығы ұйымдары Үйлестіру комитетінің төртінші отырысына қатысты. Кездесуге Түркі мемлекеттері ұйымының Бас хатшысы Кубанычбек Умиралиев, ТҮРКСОЙ Бас хатшысы Султан Раев, Халықаралық Түркі академиясының Президенті Шахин Мустафаев, Халықаралық Түркі мәдениеті мен мұрасы қорының Президенті Ақтоты Райымқұлова, сондай-ақ Түркі ынтымақтастығы ұйымдарының басқа да өкілдері қатысты. Кездесуде Бас хатшы Мехмет Сүрейя Эр Түркі ынтымақтастығы ұйымдарының әрқайсысы өз қызметі бағытында көпжақты ынтымақтастықта қойылған міндеттерді орындағанын және Түркі мемлекеттері арасындағы жан-жақты қатынастарды нығайтуға және одан әрі дамытуға бағытталған мақсатты және жүйелі жұмыс жүргізгенін атап өтті. Осы тұрғыда ол Түркі ынтымақтастығының парламенттік өлшемі және парламентаралық ынтымақтастық платформасы ретінде ТҮРКПА өзінің ынтымақтастық тетіктері мен құралдары арқылы парламенттердің тығыз өзара іс-қимылына ықпал еткенін білдірді. Қатысушылар өздерінің тиісті ұйымдарының соңғы кезеңдегі қызметі туралы хабардар етті. Олар қызметтің қайталануын болдырмау үшін үйлестіру мен тығыз ынтымақтастықты жақсартудың маңыздылығына баса назар аударды. Кездесу барысында тараптар ықтимал бірлескен іс-шаралар мен 2024 жылға арналған бірлескен іс-шаралар жоспарын талқылады.