ТҮРКПА Түркі әлемінің алғашқы Жастар форумына қатысты

2024 жылғы 21-22 қараша аралығында ТҮРКПА Бас хатшысы Мехмет Сүрейя Эр бастаған делегация Қазақстанның Алматы қаласында Түркі мәдениетін және өнерін дамыту халықаралық ұйымы (ТҮРКСОЙ) мен Әл-Фараби атындағы Қазақ ұлттық университеті (ҚазҰУ) бірлесіп ұйымдастырған Түркі әлемінің алғашқы Жастар форумына қатысты. Форумның ашылу салтанатында әл-Фараби атындағы ҚазҰУ Ректоры Жансейіт Түймебаев, ТҮРКСОЙ Бас Хатшысы Сұлтан Раев, ТҮРКПА Бас хатшысы Мехмет Сүрейя Эр, Қазақстан Республикасы Ғылым және жоғары білім вице-министрі Дархан Ахмед-Заки, Алматы қаласы әкімінің орынбасары Азамат Қалдыбеков, «Отандастар қоры» халықаралық ынтымақтастық департаментінің басқарушы директоры Ержан Мұқаш және жоғары жетістіктерге жеткен жас белсенділер сөз сөйледі. Салтанатты ашылу рәсімі Түркі әлемінің түкпір-түкпірінен келген жас буынның өнер көрсетуімен жалғасты. Ашылу салтанатының алдында қадірлі қонақтарға ТҮРКСОЙ көрмесі ұйымдастырылып, Түркі халықтарының дәстүрлі тағамдары, қолөнер бұйымдары, би мен музыкалық қойылымдары, Түркі жастарының сүрет көрмесі ұсынылды. Форумның ашылу салтанатынан кейін жоғары лауазымды тұлғалар әл-Фараби атындағы ҚазҰУ Журналистика факультетінде «ТҮРКСОЙ Медиа білім беру және зерттеу» орталығының ашылу рәсіміне қатысты. Форум барысында «Мотивациялық сұхбат», Түркі әлемінің табысқа жеткен жастарының пікірталас отырысы, «Түркі әлемі жастарының ортақ және жеке мәселелері», Диаспора жастарының бас қосуы сияқты панельдік сессиялар ұйымдастырылды. Жастардың ынтымақтастығын нығайту мақсатымен «Жастар party», «Танысу» бағдарламасы мен мәдени бағдарламалар да Форум аясында өткізілді. Форум Әл-Фараби атындағы ҚазҰУ студенттерінің Гала-концертімен аяқталды. Келесі Форум Өзбекстанның Самарқанд қаласында өтеді деп шешім қабылданды. Түркі әлемінің алғашқы Жастар форумы 25 елден 200-ден астам жастарды жинады. Форумда ТҮРКПА Бас хатшысы Мехмет Сүрейя Эрге Комиссия хатшылары Бауыржан Датқаев пен Назгүл Жолдошова ілесіп жүрді.