ТҮРКПА ТӨМгө жетишүү боюнча парламенттер аралык кызматташтык боюнча экинчи глобалдык форумга катышты

2023-жылдын 30-ноябрында ТҮРКПАнын Башкы катчысынын орун басарынын милдетин аткаруучу Сакы Садыков жетектеген делегация Өзбекстан Республикасынын Олий Мажлиси, БУУнун Өзбекстандагы кеңсеси, ЕККУнун Өзбекстандагы кеңсеси жана “Acted” бейөкмөт уюму биргелешип уюштурган Туруктуу өнүгүү максаттарына жетишүү үчүн Ташкентте парламенттер аралык кызматташтык боюнча экинчи глобалдык форумга катышты. Иш-чарага Азербайжан, Казакстан, Кыргызстан, Түркия, Өзбекстан, Беларусь, Кытай, Хорватия, Россия, Тажикстан жана Испаниянын парламентарийлери, парламенттер аралык уюмдардын, эл аралык уюмдардын жана жарандык коом институттарынын өкүлдөрү, абройлуу эксперттер жана адистер катышты. Өзбекстан Республикасынын Олий Мажлисинин Сенатынын Төрайымы Танзила Нарбаева Өзбекстан Республикасынын Президенти Шавкат Мирзиёевдин Форумдун катышуучуларына кайрылуусун окуп берди. Ачылыш аземинде Башкы катчы Мехмет Сүрейя Эр видео кайрылуу аркылуу сөз сүйлөдү. Ачылыш аземинде Өзбекстан Республикасынын Олий Мажлисинин Сенатынын Төрайымы Танзила Нарбаева, Өзбекстан Республикасынын Олий Мажлисинин Мыйзам чыгаруу палатасынын Спикери Нурдинжон Исмоилов, БУУнун Өзбекстандагы туруктуу координаторунун милдетин аткаруучу Консуэло Видал Брюс жеке катышуусунда сөз сүйлөштү, ал эми Парламенттер аралык биримдиктин башкы катчысы Мартин Чунгонг, БУУнун Экономикалык жана социалдык кеңешинин президенти Паула Нарваес, ЕККУнун Парламенттик ассамблеясынын президенти Пиа Каума, Россия Федерациясынын Федералдык Жыйынынын Федерация Кеңешинин Төрайымы, КМШ Парламенттер аралык Ассамблеясынын Төрайымы Валентина Матвиенко жана Европа Кеңешинин Парламенттик Ассамблеясынын Төрагасы Тини Кокс видеокайрылууларын жөнөтүштү. Өз кайрылуусунда Башкы катчы Мехмет Сүрейя Эр Туруктуу өнүгүү максаттарына (ТӨМ) жетүүдө парламенттердин жана парламентарийлердин чечүүчү жана өзгөчө ролун баса белгиледи. Ал ТҮРКПАга мүчө мамлекеттер ТӨМгө жетишүүгө чоң маани берерин белгилеп, ТҮРКПАнын 2030-жылга чейинки Туруктуу өнүгүү күн тартибинин максаттарына мындан ары да салым кошууга умтулуусун жана чечкиндүүлүгүн кайталады. Башкы катчы Өзбекстан Республикасынын Президенти Шавкат Мирзиёевдин жетекчилиги астында жүргүзүлүп жаткан реформалардын региондогу туруктуу өнүгүүгө жетишүүдөгү кыймылдаткыч күчтөрдүн бири болгон өлкөнүн мындан аркы өнүгүшүндөгү негизги ролун баса белгилеп, Өзбекстан парламентинин жакынкы келечектеги Ассамблеяга толук кандуу мүчөлүгүн ишке ашарына ишенимин билдирди. Өзбекстан Республикасынын Олий Мажлисинин Сенатынын Төрайымы Танзила Нарбаева ТӨМгө жетүү үчүн парламенттер, өкмөттөр жана жарандык коом институттары ортосунда практикалык кызматташууну жолго коюу зарылдыгына токтолду. Өзбекстанда ТӨМгө жетишүүнүн жаңы механизми киргизилгени, укуктук жана институционалдык реформалар ишке ашырылганы баса белгиленди. Улуттук максаттарды жана милдеттерди ишке ашырууну, ошондой эле ТӨМгө жетүүдөгү кызыкчылыктардын тең салмактуулугун камсыздоонун эффективдүү механизмин көзөмөлдөө боюнча парламенттик комиссия түзүлдү, жана бул жаатта парламенттик жана коомдук көзөмөл да түзүлдү. Форумда “2030-жылга чейинки Глобалдык күн тартибин натыйжалуу ишке ашырууга көмөктөшүүдөгү парламенттин ролу жана парламенттер аралык кызматташуу”, “ТӨМгө жетүүдөгү прогрессти тездетүүдөгү гендердик жана жаштар саясаты” жана “2030-жылга чейин Туруктуу өнүгүүнүн Күн тартибин ишке ашырууда парламент менен жарандык коомдун өз ара аракети” деген темалар боюнча үч сессия өттү. Форум ТӨМгө жетишүү боюнча парламенттер аралык кызматташтыктын маанилүү аспектилерин камтыган Ташкент Коммюникесин кабыл алуу менен жыйынтыкталды.