ТҮРКПА СБМ Өзбекстан ОСК Төрағасымен кездесті

2024 жылғы 25 қазанда ТҮРКПА Сайлауды бақылау жөніндегі миссиясы (СБМ) Өзбекстан Республикасы Орталық сайлау комиссиясының (ОСК) Төрағасы Зайниддин Низамходжаевпен кездесті. ОСК Төрағасы Миссия мүшелерін қарсы алып, елдің өкілді органдарына сайлауға дайындық барысына шолу жасады. Ол Өзбекстан Республикасы Олий Мажлисінің Заң шығару палатасына сайлау үшін пропорционалды өкілдік пен мажоритарлық құрамдарды біріктіретін, бір мандатты сайлау округтері бойынша 75 депутат және жабық партиялық тізімдер арқылы жалпыұлттық сайлау округінен 75 депутат сайланатын жаңадан енгізілген аралас сайлау жүйесі туралы хабардар етті. Ол сондай-ақ сайлауды басқару құрылымындағы өзгерістерді және саяси партиялардың кандидаттар ұсынуы кезінде әйелдерге арналған квотаның 30%-дан 40%-ға дейін ұлғайтылғанын атап өтті. Зайниддин Низамходжаев парламенттік сайлауға барлығы 875 кандидат тіркелгенін, оның ішінде 375-і бір мандатты округтер бойынша, 500-і партиялық тізім бойынша дауысқа түскенін хабарлады. Шетелде 40 елде 57 сайлау учаскесімен бірге барлығы 11 028 сайлау учаскесі құрылды. ОСК Төрағасы сайлау күні тұрғылықты жері бойынша сайлау учаскелерінде дауыс бере алмағандар үшін мерзімінен бұрын дауыс беру үдерісіне тоқталып, мерзімінен бұрын дауыс беру қазанның 16-сы мен 23-і аралығында өткенін білдірді. Ол парламенттік сайлауға 850-ден астам халықаралық байқаушы аккредиттелгенін хабарлады. Ол сондай-ақ сайлау процесіне қатысушылардың өзара іс-қимылын цифрландыру үшін әзірленген «Е-сайлов» ақпараттық жүйесі туралы да айтып берді. Миссия өз кезегінде сайлау үдерісінің сәтті өтуіне ізгі тілектерін білдірді. ТҮРКПА СБМ құрамына Әзербайжан, Қазақстан, Қырғызстан және Түркия парламентшілері – Ахлиман Амирасланов, Агалар Валиев (Әзербайжан), Құдайберген Бексултанов (Қазақстан), Азизбек Турсунбаев (Қырғызстан), Осман Местен, Махмут Рыдван Назырлы, Кадим Дурмаз, Харун Өзгүр Йылдызлы, Филиз Кылыч, Өмер Фарук Гергерлиоғлу (Түркия), ТҮРКПА Бас хатшысы Мехмет Сүрейя Эр, парламенттік қызметкерлер және ТҮРКПА Хатшылығының басқа да өкілдері қатысты. Миссияны Түркия Ұлы Ұлттық Жиналысының депутаты Осман Местен басқарады.