ТҮРКПА СБМ Әзербайжан Сыртқы істер министрінің орынбасарымен кездесті

2024 жылғы 30 тамызда ТҮРКПА Сайлауды бақылау жөніндегі миссиясы Әзербайжан Республикасы Сыртқы істер министрінің орынбасары Самир Шарифовпен кездесті. Миссияны қарсы алған Министрдің орынбасары Әзербайжан ТүркПА қызметіне үлкен мән беретінін атап өтті. ТҮРКПА-ның парламентаралық ынтымақтастықты дамытудағы рөліне тоқталған Шарифов мырза Ассамблея аясындағы ынтымақтастық тетіктері өзінің тиімділігін дәлелдегенін білдірді. Ол Әзербайжан ұйымның қызметіне одан әрі қолдау көрсететінін атап өтті. Әзербайжандағы кезектен тыс парламенттік сайлаудың маңыздылығына тоқталған Министрдің орынбасары азат етілген аумақтарда алғаш рет парламенттік сайлау өтетінін және азаматтардың туған жерінде сайлау құқықтарын жүзеге асыра алатынын айтты. Шарифов ТҮРКПА-ның сайлау мониторингі бойынша айтарлықтай тәжірибесін атап, Миссия кезектен тыс парламенттік сайлауды бақылау үдерісіне елеулі үлес қосатынына сенім білдірді. Азат етілген аумақтарда сайлау учаскелері құрылғанын айта отырып, Миссия осы аумақтарда да өтетін кезектен тыс парламенттік сайлаудың маңыздылығына назар аударды. Миссия сайлауды байқау үшін жасалған жағдайларға ризашылығын білдіріп, сайлауды өткізуге сәттілік тіледі. ТҮРКПА Сайлауды бақылау жөніндегі миссиясының құрамына Қазақстан мен Түркия парламентшілері – Мұқаш Ескендіров (Қазақстан), Ахмет Зенбилджи, Эмре Чалышкан, Махмут Рыдван Назырлы, Кадим Дурмаз және Филиз Кылыч (Түркия), ТҮРКПА Бас хатшысы Мехмет Сүрейя Эр, парламент қызметкерлері және ТҮРКПА Хатшылығының басқа да өкілдері кіреді. Миссияны Түркия Ұлы Ұлттық Жиналысының депутаты Ахмет Зенбилджи басқарады.