ТҮРКПА СБМ Әзербайжан ОСК Төрағасымен кездесті

2024 жылғы 30 тамызда ТҮРКПА Сайлауды бақылау жөніндегі миссиясы Әзербайжан Республикасы Орталық сайлау комиссиясының (ОСК) Төрағасы Мазахир Панаховпен кездесті. ОСК Төрағасы Миссия мүшелерін қарсы алып, Әзербайжандағы кезектен тыс парламенттік сайлауға дайындық барысы туралы хабарлады. Ол сайлау жүйесі, сайлауды ұйымдастыру, кандидаттарды тіркеу, мүмкіндігі шектеулі сайлаушылардың сайлау құқықтарын қамтамасыз ету шаралары және сайлауды бақылау туралы айтып берді. ОСК Төрағасы кезектен тыс парламенттік сайлауға 990 кандидат қатысқанын атап өтті. 990 кандидаттың 305-ін 25 саяси партия ұсынған. Тұрақты негізде 6343 сайлау учаскесі жұмыс істесе, уақытша 135 сайлау учаскесі құрылды. Азат етілген аумақтарда 54 сайлау учаскесі құрылды. Тиісті сайлау учаскелері пандустармен жабдықталып, барлық сайлау учаскелері Брайль шрифті трафареттерімен жабдықталды. Ел бойынша 1000 сайлау учаскесінде ашықтықты арттыру үшін веб-камералар орнатылды. ОСК Төрағасы кезектен тыс парламенттік сайлауды бақылауға 600-ге жуық халықаралық және 112 мыңға жуық жергілікті бақылаушы тіркелгенін хабарлады. ТҮРКПА Миссиясы азат етілген аумақтарда дауыс беруді өткізу тұрғысынан сайлаудың маңыздылығын атап өтті. Миссия алдағы сайлауды өткізуге сәттілік тіледі. ТҮРКПА Сайлауды бақылау жөніндегі миссиясының құрамына Қазақстан мен Түркия парламентшілері – Мұқаш Ескендіров (Қазақстан), Ахмет Зенбилджи, Эмре Чалышкан, Махмут Рыдван Назырлы, Кадим Дурмаз және Филиз Кылыч (Түркия), ТҮРКПА Бас хатшысы Мехмет Сүрейя Эр, парламент қызметкерлері және ТҮРКПА Хатшылығының басқа да өкілдері кіреді. Миссияны Түркия Ұлы Ұлттық Жиналысының депутаты Ахмет Зенбилджи басқарады.