ТҮРКПА мүше парламенттердің денсаулық сақтау мәселелері жөніндегі комитеттер басшыларының екінші отырысы

2025 жылғы 22 қаңтарда Бакуде Әзербайжан Республикасы Милли Меджлисінің ұйымдастыруымен ТҮРКПА мүше парламенттердің денсаулық сақтау мәселелері жөніндегі комитеттері басшыларының екінші отырысы өтті. «Климаттың өзгеруі және денсаулық: климаттың өзгеруінің денсаулыққа әсеріне заңнамалық жауаптар» тақырыбы аясында өткен отырыс ТҮРКПА мүше және бақылаушы мемлекеттердің, сондай-ақ Өзбекстанның парламентшілерін денсаулық сақтау саласындағы өзекті проблемаларды заңнамалық тұрғыдан шешу жолдарын талқылады. Іс-шараны Әзербайжан Республикасы Милли Меджлисінің Денсаулық сақтау комитетінің төрағасы, ТҮРКПА Қоршаған орта, табиғи ресурстар және денсаулықты сақтау жөніндегі комиссиясының төрағасы Ахлиман Амирасланов алғы сөзімен ашып, климаттың өзгеруінің денсаулыққа қолайсыз салдарын жою және кеңейтілген парламентаралық ынтымақтастықтың қажеттігі шеңберінде ТҮРКПА денсаулық сақтау саласындағы сенімді, тұрақты және бейімделген саясатты қалыптастыру үшін заңнамалық базаны жетілдірудің маңыздылығын атап өтті. Түркия Ұлы Ұлттық Жиналысының Денсаулық, отбасы, еңбек және әлеуметтік мәселелер жөніндегі комиссиясының төрағасы Ведат Билгин, Қырғыз Республикасы Жогорку Кенешінің Әлеуметтік саясат комитетінің төрайымы Винера Раимбачаева, Қазақстан Республикасы Парламенті Мәжілісінің Әлеуметтік-мәдени даму комитетінің мүшесі Гүлдара Нұрымова (онлайн режимде қатысты), Өзбекстан Республикасы Олий Мажлис Сенатының Ғылым, білім және денсаулық сақтау мәселелері комитетінің төрағасы Бахром Абдуллаев, Солтүстік Кипр Түрік Республикасы Ассамблеясының Әкімшілік, қоғамдық және денсаулық сақтау істері комитеті төрағасының орынбасары Филиз Бесим, Әзербайжан Республикасы Милли Меджлисінің Әлеуметтік заңнама бөлімінің меңгерушісі Адиль Валиев, ТҮРКПА Бас хатшысы Мехмет Сүрейя Эр, Солтүстік Кипр Түрік Республикасы Ассамблеясының Әкімшілік, қоғамдық және денсаулық сақтау істері комитетінің мүшесі Ахмет Савашан мен Әзербайжан Республикасы Милли Меджлисінің Денсаулық сақтау комитетінің мүшесі Парвана Валиева отырыста сөз сөйледі. Бас хатшы Мехмет Сүрейя Эр өз сөзінде климаттың өзгеруінің халықтың денсаулығына ықпалының күшеюіне байланысты әлем жаһандық сынаққа тап болғанын білдірді. Ол осы міндеттерді шешу үшін ұжымдық әрекет ету қажеттігін айтып, аймақтық ынтымақтастықты нығайтудың маңыздылығына тоқталды. Сондай-ақ ол жасыл технологияларды дамыту және халықтың экологиялық стандарттар туралы хабардарлығын арттыру рөліне назар аударды. Бас хатшы ТҮРКПА мүше парламенттердің климаттың өзгеруі және денсаулық мәселелері бойынша ынтымақтастығы осы саладағы жаһандық күш-жігерге септігін тигізетінін атап өтті. Талқылаулар климаттық факторлардың әсерінен денсаулыққа байланысты қауіптерді азайтуға, заңнамалық негіздерді нығайтуға және ТҮРКПА мүше мемлекеттерде денсаулық сақтау саласындағы тұрақты саясатты ілгерілетуге бағытталған. Бағдарлама аясында делегациялар Әзербайжан халқының ұлттық көшбасшысы Гейдар Әлиевке құрмет көрсету үшін «Құрмет» аллеясына барды. Одан кейін олар «Шәһидтер» аллеясы мен «Түрік шейіттігі» монументіне барып, гүл шоқтарын қойды.