ТҮРКПА Лачын Климаттық әрекеті диалогына қатысты

2024 жылғы 24 мамырда Бас хатшы орынбасарының міндетін атқарушы Сакы Садыков Лачын Климаттық әрекеті диалогына қатысты. COP29-ның тұсаукесер рәсімін қамтитын іс-шараны Әзербайжан Республикасының Сыртқы істер министрлігі ұйымдастырды. Іс-шараларға мемлекеттік қызметкерлер, парламентшілер, дипломатиялық корпус өкілдері және басқа да қонақтар қатысты. Тұсаукесер рәсімінде сөз сөйлеген Әзербайжан Республикасы Президентінің көмекшісі – Президент Әкімшілігінің Сыртқы саясат бөлімінің меңгерушісі Хикмет Гаджиев Әзербайжанның алға қойған мақсаттарына жетуге бел байлағанын және осы мақсатқа жету үшін бар күш-жігерін салуға ниетті екенін атап өтті. Хикмет Гаджиев ынтымақтастық, әмбебап қолдау, инвестиция және инновация арқылы «жасыл» энергияны кез келген жерде өндіруге болатынын айтты. Әзербайжанның Экология және табиғи ресурстар министрі, COP29 Президенттігіне тағайындалған Мұхтар Бабаев COP29-ға дайындық бойынша ынтымақтастықтың маңыздылығын айта отырып, Әзербайжанда аккредиттелген дипломаттарды конференцияға дайындықта, атап айтқанда іс-шараның күн тәртібін әзірлеуде белсенді болуға шақырды. 24 мамырда Лачын Климаттық әрекеті диалогы аясында іс-шараға қатысушылар «Зерті» агроөнеркәсіптік паркінде болды. Қонақтарға «Зерті» агроөнеркәсіптік паркінде жүргізіліп жатқан ауылшаруашылық жұмыстары туралы ақпарат берілді. Қатысушылар «Хочазфильм» киностудиясында да болды. «Хочазфильм» киностудиясының келешегі зор бағыттарына Қарабақ өңірін кеңінен насихаттауға байланысты жобаларды жүзеге асыру, өңірде өтетін мәдени іс-шараларды көрсету, Лачын қаласындағы қалпына келтіру жұмыстарының барысымен танысу, ұлттық брендтер мен жергілікті өнімдерді насихаттау, кинематография және өнер курстары мен байқаулар ұйымдастыру жатады. Бағдарлама Қарабақ пен Шығыс Зәңгезүрдің экожүйесін қалпына келтіруге үлес қосу мақсатында Лачын өңірінің Хакари өзеніне жас форельді жіберу барысын бақылаумен жалғасты. Одан кейін 28 мамыр Әзербайжанның Тәуелсіздік күніне арналған «Кілем осылай жасалды» көрмесінің ашылуы болды. Ағымдағы жылдың қараша айында Әзербайжанда БҰҰ Климаттың өзгеруі бойынша COP29 негізгі конвенциясы Тараптары конференциясының 29-шы сессиясын өткізу жоспарлануда. Біріккен Ұлттар Ұйымының Климаттың өзгеруі жөніндегі негізгі конвенциясы – 1992 жылы маусымда Рио-де-Жанейрода өткен Жер саммитінде адамның климаттық жүйеге қауіпті араласуының алдын алу мақсатында жасалған келісім. COP29 (Тараптар Конференциясы) – Климаттың өзгеруі жөніндегі негізгі конвенцияның орындалуын бақылайтын жоғары заң шығарушы орган болып табылатын конференция. Конвенцияға 198 мемлекет қатысушы болып табылады.