ТҮРКПА Гейдар Әлиевтің 100 жылдығына арналған халықаралық конференцияға қатысты

2023 жылғы 1 маусымда Бас хатшының орынбасары Талғат Адуов Әзербайжан Республикасының Милли Меджлисі, ТМД Парламентаралық Ассамблеясы (ТМД ПАА) және ТМД ПАА-ға мүше мемлекеттердің Демократияны, парламентаризмді дамыту және азаматтардың сайлау құқықтарын қорғау халықаралық мониторингі институтының (ТМД ПАА ДПДАСҚҚХМИ) Баку филиалы бірлесіп ұйымдастырған Әзербайжан халқының жалпыұлттық көшбасшысы Гейдар Әлиевтің 100 жылдығына арналған «Гейдар Әлиев – қазіргі Тәуелсіз Әзебайжанның сәулетшісі және Әзербайжан мультикультурализмінің негізін қалаушы» атты халықаралық конференцияға қатысты. Іс-шараға ТМД-ға қатысушы мемлекеттердің парламентшілері, халықаралық ұйымдардың, дипломатиялық корпустың, министрліктердің, білім беру және басқа да мекемелердің өкілдері қатысты. Іс-шара ТМД ПАА ДПДАСҚҚХМИ Баку филиалының директоры Рамин Рзаевтың кіріспе сөзінен басталды. Ол Әзербайжан Республикасы Милли Меджлисінің Төрайымы Сагиба Гафарованың атынан сәлемдеме сөзін жеткізу үшін Әзербайжан Республикасы Милли Меджлисінің Халықаралық байланыстар бөлімінің меңгерушісі Илькин Мамедовке сөз берді. Өз кезегінде ТМД ПАА Бас хатшысының орынбасары Айдын Джафаров Ресей Федерациясы Федералдық Жиналысы Федерациясы Кеңесінің Спикері және ТМД ПАА Кеңесінің Төрайымы Валентина Матвиенконың, сондай-ақ ТМД ПАА Бас хатшысы Дмитрий Кобицкийдің атынан сәлемдеме сөз сөйледі. Конференция қатысушылардың іс-шара тақырыбы бойынша сөйлеген сөздерімен жалғасты. Қатысушылар Гейдар Әлиевтің мультикультурализм мен толеранттылық саясаты, оның Әзербайжанның мультикультурализм мен толеранттылықтың ғасырлар бойғы дәстүрлерін дамытуға қосқан құнды үлесі туралы айтып, ТМД елдері мен бүкіл әлем үшін Ұлы көшбасшының саяси мұрасы мен тәжірибесінің маңыздылығын атап өтті. Конференция оқушылар арасында «Тәуелсіз Әзербайжан Республикасының негізін қалаушы және сәулетшісі Гейдар Әлиев - 100 жылдығы» тақырыбындағы эссе байқауының жеңімпаздарын марапаттау рәсімімен аяқталды.