ТҮРКПА Гейдар Әлиевтің 100 жылдығына арналған конференция өткізді

2023 жылғы 21 қарашада ТҮРКПА Бакуде Әзербайжан халқының ұлттық көшбасшысы Гейдар Әлиевтің 100 жылдығына арналған «Гейдар Әлиев және парламентаризм» атты халықаралық конференция ұйымдастырды. Конференция алдында «Құрмет» аллеясындағы Әзербайжан халқының Ұлттық көшбасшысы Гейдар Әлиевтің қабіріне және «Мәңгілік алау» мемориалдық кешенінде, сондай-ақ «Шехиттер» аллеясындағы түрік шейіттерінің мемориалына делегациялардың қатысуымен гүл шоқтарын қою рәсімі өтті. Конференцияға Түркі мемлекеттерінің парламенттік делегациялары, парламентаралық ұйымдардың, Түркі ынтымақтастығы ұйымдарының және басқа да әріптестік институттардың өкілдері, сондай-ақ Бакуде аккредиттелген Түркі мемлекеттерінің дипломатиялық миссияларының басшылары қатысты. Іс-шараны Бас хатшы Мехмет Сүрейя Эр ашты. Бас хатшы өзінің кіріспе сөзінде Әзербайжан мемлекеттілігі мен парламентаризм дәстүрлерін дамытудағы Гейдар Әлиевтің рөлін атап өтті. Ол Гейдар Әлиевтің Түркі мемлекеттері арасындағы қатынастарды дамытуға қосқан құнды үлесіне тоқталып, қазіргі кезеңде Түркі әлеміндегі оң динамикамен белсенді дамып келе жатқан ынтымақтастық ұлы көшбасшының көреген идеяларының іске асуы болып табылатынын атап өтті. Конференцияда ТҮРКПА-да төрағалық етіп жатқан Түркия Ұлы Ұлттық Жиналысы Спикерінің орынбасары Бекир Боздағ, Әзербайжан Республикасы Милли Меджлисінің депутаттары Ахлиман Амирасланов пен Хикмат Мамедов, Қырғыз Республикасы Жогорку Кенешінің депутаты Дастанбек Жұмабеков, Түркия Ұлы Ұлттық Жиналысының депутаты Ахмет Зенбилджи, Өзбекстан Республикасы Олий Мажлисі Сенатының депутаты Шухрат Чуллиев, ҚТЭЫ ПА Бас хатшысы Асаф Гаджиев, Түркі академиясының Президенті Шахин Мұстафаев, Түркі мәдениеті және мұрасы қорының тұңғыш Президенті Гүнай Афендиева, Түркі мемлекеттері ұйымының Ақсақалдар кеңесінде Әзербайжанның өкілі Гасан Гасанов және Баку Юнус институтының үйлестірушісі Эмре Селчук Каракылыч сөз сөйледі. Конференцияның модераторы Әзербайжан Республикасы Милли Меджлисінің депутаты, ТҮРКПА Білім, мәдениет, әлеуметтік және гуманитарлық мәселелер жөніндегі комиссиясының мүшесі Хикмат Мамедов болды. Қатысушылар Әзербайжан мен бүкіл Түркі әлемі тарихында Түркі мемлекеттерінің бірлігі мен ынтымақтастығын нығайту жолында өшпес із қалдырған Гейдар Әлиевтің тынымсыз күш-жігері туралы айтты. Олар барлық Түркі мемлекеттеріндегі Гейдар Әлиевтің тұлғасы мен саяси мұрасына деген үлкен құндылығы мен терең құрметін атап өтті. Сөз сөйлеушілер қазіргі Әзербайжан парламентаризмінің жаңа кезеңінің бастауында тұрған Гейдар Әлиевтің Парламенттің рөлі мен беделін арттыруға қосқан үлесін атап өтті. Іс-шара барысында мемлекет қайраткері, Түркі мемлекеттері ұйымының Ақсақалдар кеңесінде Әзербайжанның өкілі Гасан Гасанов әзербайжан тілінен түрік тіліне Түркі академиясы аударған Әзербайжан халқының ұлттық көшбасшысы Гейдар Әлиевтің туғанына 100 жыл толуына арналған «Гейдар Әлиев: жарқын, харизматикалық тұлға туралы естеліктер» атты кітабын ұсынды.