ТҮРКПА «Дипломатия әлемі» журналының арнайы санының таныстырылым рәсіміне қатысты

2025 жылғы 17 желтоқсанда Түркі мемлекеттері Парламенттік Ассамблеясы (ТҮРКПА) Бас хатшысының орынбасары Мұхаммет Алпер Хаяли Әзербайжан Республикасының Сыртқы істер министрлігі шығаратын «Дипломатия әлемі» журналының арнайы санының таныстырылым рәсіміне қатысты. Аталған іс-шара Баку қаласындағы ADA университетінде өтті. «COP29: Жасыл әлем үшін ынтымақтастықта» деп аталған бұл арнайы сан Әзербайжан Республикасының Біріккен Ұлттар Ұйымының Климаттың өзгеруі туралы негіздемелік конвенциясы Тараптар конференциясының 29-сессиясына (COP29) төрағалық етуіне арналған. Іс-шараға Әзербайжан Республикасының Милли Мәжілісінің депутаты және ADA университетінің проректоры Фариз Исмайлзаде, COP29 Президенті әрі Әзербайжан Республикасы Президентінің климат мәселелері жөніндегі өкілі Мұхтар Бабаев, COP29 бас келіссөзшісі және Әзербайжан Республикасының Сыртқы істер министрінің орынбасары Ялчин Рафиeв, сондай-ақ өзге де мемлекеттік органдардың жоғары лауазымды өкілдері мен сарапшылар қатысты. Арнайы шығарылымда COP29 аясында Әзербайжан Республикасының Президенті Илхам Әлиев пен Бірінші вице-президенті Мехрибан Әлиеваның қатысуы мен сөйлеген сөздері кеңінен қамтылған. Сонымен қатар басылымда Әзербайжан Республикасының Сыртқы істер министрі, Президенттің климат мәселелері жөніндегі өкілі және өзге де ресми тұлғалардың COP29 тақырыбына арналған мақалалары жарияланған.