ТҮРКПА COP29 іс-шараларына қатысуда

2024 жылғы 13 қарашада Бас хатшының орынбасары Сакы Садыков Қырғызстан 2024 жылғы 11-22 қараша аралығында Әзербайжанның Баку қаласында өтіп жатқан Біріккен Ұлттар Ұйымының Климаттың өзгеруі жөніндегі негіздемелік конвенциясына (COP29) қатысушылардың конференциясы шеңберінде Әзербайжан және Моңғолиямен бірлесіп ұйымдастырған Таулы күн тәртібін ілгерілету және таулар мен климаттың өзгеруі тақырыбын өзекті ету жөніндегі жоғары деңгейдегі диалогқа қатысты. Іс-шараға Қырғыз Республикасының Президенті Садыр Жапаров, Моңғолия Президенті Ухнаагийн Хурелсух, Непал Президенті Рам Чандра Паудель, Әзербайжан Республикасының Сыртқы істер министрі Джейхун Байрамов және басқа да жоғары лауазымды тұлғалар қатысты. Президент Садыр Жапаров өз сөзінде халықаралық қауымдастықты жаһандық парниктік газдар шығарындыларына аз үлес қосқанына қарамастан, климаттың өзгеруіне ең осал таулы елдерге қолдау көрсетуді күшейтуге шақырды. Өз кезегінде Министр Джейхун Байрамов таулардағы мұздықтардың еруі, соның салдарынан болған су тасқыны мен көшкін сияқты апаттар жүйелі шаралар қабылдауды талап ететінін атап өтіп, таулы аймақтарда тұратын халықты қорғауға барынша күш салудың әрі шешімдерді іздеудегі ынтымақтастықты нығайтудың қажеттігін айтты. COP29 негізгі тақырыптары парниктік газдар шығарындыларын азайту шаралары, климатты қаржыландыру, энергетикадағы технологиялық инновациялар, жас ұрпақты тәрбиелеу және климаттың өзгеруімен күресуге бағытталған жастар бастамаларын қолдау болып табылады. Іс-шараға қатысу аясында Сакы Садыков «Қырғызстан: таулардың тұрақты дамуы» жалпы тақырыбы аясындағы ұлттық павильонды, сондай-ақ климаттық күн тәртібінің өзекті мәселелері бойынша министрліктер мен ведомстволардың қатысуымен презентациялар өтіп жатқан басқа елдердің павильондарын аралады. СOP29-ға әлемнің түкпір-түкпірінен 72 000 адам, оның ішінде 100-ден астам елдің көшбасшылары қатысуда. Біріккен Ұлттар Ұйымының Климаттың өзгеруі жөніндегі негіздемелік конвенциясы – 1992 жылы маусымда Рио-де-Жанейрода өткен Жер саммитінде адамзаттың климаттық жүйеге қауіпті араласуының алдын алу мақсатында жасалған келісім. Қазір Конвенцияның 198 Тарапы бар. Тараптар Конференциясы (COP) Конвенцияның орындалуын қадағалайтын жоғары орган болып табылады және егер Тараптар басқа шешім қабылдамаса, жыл сайын өткізіледі.