ТҮРКПА Бірінші Түркологиялық құрылтайдың 100 жылдығына арналған көрменің ашылу рәсіміне қатысты

2026 жылғы 2 шілдеде ТҮРКПА Бас хатшысының орынбасары міндетін атқарушы Бектұр Базакечов Баку қаласында өткен Бірінші Түркологиялық құрылтайдың 100 жылдығына арналған «Баку, 1926: Тіл, Ой, Бірлік» атты көрменің ашылу рәсіміне қатысты.

Әзербайжанның Ұлттық тарих музейі мен Түркі мәдениеті және мұрасы қоры Әзербайжан Республикасы Мәдениет министрлігінің қолдауымен бірлесіп ұйымдастырған көрме Бірінші Түркологиялық құрылтайдың тарихи маңызын, түркі халықтарының ортақ ғылыми және мәдени мұрасын, сондай-ақ түркологияның академиялық пән ретінде қалыптасуы мен дамуын кеңінен таныстыруды мақсат етеді.

Көрмеде түркі әлемі тарихының маңызды кезеңдері, соның ішінде 1926 жылғы Бірінші Түркологиялық құрылтай, тіл және әліпби реформалары, түркі халықтарының ортақ мәдени мұрасын сақтау және насихаттау мәселелері қамтылған. Сонымен қатар экспозицияда тәуелсіздік кезеңіндегі түркі әлемінің жаңғырған интеграциялық үдерістері де көрініс тапқан.

Көрмеге Әзербайжанның Ұлттық тарих музейі, Әзербайжан Республикасының Ұлттық архиві және профессор Адалат Тахирзаденің жеке архивінде сақталған сирек архивтік құжаттар, Құрылтайдың ресми материалдары, тарихи фотосуреттер және басқа да құнды жәдігерлер қойылған.