ТҮРКПА Білім, мәдениет, әлеуметтік және гуманитарлық мәселелер жөніндегі комиссиясының он бірінші отырысы өтті

2024 жылғы 14 мамырда Анкарада Түркия Ұлы Ұлттық Жиналысының ұйымдастыруымен «ТҮРКПА-ға мүше елдер арасында еңбек көші-қонының жағдайларын жеңілдету (ұлттық заңнамаларды жақындастыру)» тақырыбында ТҮРКПА Білім, мәдениет, әлеуметтік және гуманитарлық мәселелер жөніндегі комиссиясының он бірінші отырысы өтті. Отырысты Комиссия төрағасының міндетін атқарушы, Қырғыз Республикасы Жогорку Кенешінің депутаты Улан Бакасов жүргізді. Комиссия мүшелері күн тәртібіндегі мәселелерді талқылап, отырыстың негізгі тақырыбы бойынша пікір алмасты. Кездесу барысында ТҮРКПА-ға мүше мемлекеттер арасында көші-қон үдерісі саласындағы тәжірибе, сондай-ақ еңбек көші-қоны үшін жағдайды жеңілдету мәселелері талқыланды. Күн тәртібіндегі мәселелердің бірі Әзербайжан Республикасы Милли Меджлисінің Әлеуметтік заңнама бөлімінің меңгерушісі Әділ Валиев дайындаған «Еңбек нарығының талаптарына сәйкес кадрларды даярлау туралы» модельдік заңның жобасына арналды. Комиссия негізгі тақырып бойынша есеп пен ұсынымдарды, сондай-ақ «Еңбек нарығының талаптарына сәйкес кадрларды даярлау туралы» модельдік заңның жобасын одан әрі 2024 жылғы 6 маусымда Баку қаласында өтетін ТҮРКПА-ның Он үшінші пленарлық отырысына шығару үшін мақұлдады. Комиссияның келесі отырысын 2025 жылы Әзербайжанда өткізу туралы шешім қабылданды.