ТҮРКПА Бас хатшысы Түркия Парламентінің Төрағасы, профессор, доктор Нуман Куртулмушпен кездесті

2026 жылғы 16 маусымда Түркі мемлекеттері Парламенттік Ассамблеясының (ТҮРКПА) Бас хатшысы, Елші Рамиль Гасан Түркия Республикасына ресми сапары аясында Түркия Ұлы Ұлттық Мәжілісінің (ТҰҰМ) Төрағасы, профессор, доктор Нуман Куртулмушпен кездесу өткізді.

ТҮРКПА-ны құру туралы келісімге 2008 жылғы 21 қарашада Ұйымның негізін қалаушы мемлекеттердің бірі — Түркия Республикасының Ыстанбұл қаласындағы Долмабахче сарайында қол қойылғанын атап өткен ТҮРКПА Бас хатшысы, Елші Рамиль Гасан Ассамблеяның көп жылдар бойы өз қызметін табысты жүзеге асырып келе жатқанын және түркі мемлекеттері арасындағы парламентаралық ынтымақтастықтың сапалы жаңа даму кезеңіне өткенін айтты. Ол сондай-ақ бауырлас мемлекеттердің заң шығарушы органдары арасындағы байланыстарды одан әрі жақындастыру, модельдік заңнаманы әзірлеу және қабылдау, сондай-ақ Түркі мемлекеттері басшылары қабылдаған тарихи шешімдердің ұлттық парламенттер тарапынан жедел ратификациялануына ықпал ету сияқты саяси және стратегиялық тұрғыдан маңызды бірқатар үдерістерде ТҮРКПА-ның атқарып отырған әрі алдағы уақытта да атқара алатын маңызды рөлін ерекше атап өтті. Осыған байланысты Түркия Ұлы Ұлттық Мәжілісінің Төрағасына парламентаралық ынтымақтастықты нығайтуға және ТҮРКПА қызметінің тиімділігін арттыруға бағытталған алдағы қадамдарға қатысты бірқатар ұсыныстар ұсынылды.

Өз кезегінде Түркия Ұлы Ұлттық Мәжілісінің Төрағасы, профессор, доктор Нуман Куртулмуш Бас хатшының қызметіне жоғары баға беріп, соңғы он айда атқарылған жұмысты оң бағалады. Ол алдағы бастамалардың бауырлас елдер арасындағы стратегиялық ынтымақтастықты жаңа деңгейге көтеруге ықпал ететініне және түркі мемлекеттері арасындағы ортақ парламенттік платформаны дамытудың келесі кезеңін қалыптастыратынына сенім білдірді. Сонымен қатар, ол Түркия Ұлы Ұлттық Мәжілісінің ТҮРКПА қызметіне алдағы уақытта да қолдау көрсетуді жалғастыруға бейілді екенін растады.

Кездесуге Бас хатшымен бірге Бас хатшының орынбасары Мұхаммет Алпер Хаяли қатысты.