ТҮРКПА Бас хатшысы Қырғыз Республикасы Парламентінің Төрағасымен кездесті

2026 жылғы 5 қазанда Түркі мемлекеттерің Парламенттік Ассамблеясының (ТҮРКПА) Бас хатшысы, Елші Рамиль Гасан Қырғыз Республикасына ресми сапары аясында Қырғыз Республикасы Жогорку Кенешінің Төрағасы Мәрлен Маматалиев мырзамен кездесті.

Кездесу барысында 19–20 қазанда Қырғыз Республикасының астанасы Бішкек қаласында өтетін ТҮРКПА-ның 15-ші Пленарлық отырысына дайындық мәселелері талқыланды. Тараптар Пленарлық отырысқа дайындықтың түрлі аспектілері бойынша пікір алмасты.

Бас хатшы Төрағаға өткен бір жыл ішінде атқарылған жұмыстар, Пленарлық отырысқа дайындық барысы, сондай-ақ мүше мемлекеттер парламенттері төрағалары мен серіктес ұйымдар басшыларының қатысуы туралы ақпарат берді. Сонымен қатар тараптар хаттамалық, ұйымдастырушылық және өзге де байланысты мәселелер бойынша жан-жақты пікір алмасты.

Өз кезегінде Қырғыз Республикасы Жогорку Кенешінің Төрағасы Мәрлен Маматалиев мырза ТҮРКПА қызметіне жоғары баға беріп, Халықаралық хатшылықтың жұмысына жан-жақты қолдау көрсететінін растады. Ол қабылдаушы ел ретінде Қырғыз Республикасы Сыртқы істер министрлігімен үйлестіре отырып, Пленарлық отырыс пен Ассамблея Кеңесінің отырысын жоғары деңгейде өткізу үшін қажетті дайындық жұмыстарын жүргізіп жатқанын атап өтті. Сондай-ақ осы бағытта Халықаралық хатшылықпен қалыптасқан ынтымақтастыққа қанағаттанатынын білдірді.

Мәрлен Маматалиев Қырғыз Республикасы Жогорку Кенешінің ТҮРКПА қызметіне бұдан әрі де жан-жақты қолдау көрсететінін атап өтті. Ол заң шығарушы органдар арасындағы байланыстарды нығайтудың ерекше маңызын атап өтіп, ТҮРКПА Тұрақты комиссиялары қабылдайтын шешімдердің бауырлас елдердің парламенттерінде ұқсас заңнамалық нормалардың қабылдануына ықпал етудегі маңыздылығына назар аударды.

Кездесу жылы әрі достық ахуалда өтіп, тараптар өзара қызығушылық тудыратын басқа да мәселелер бойынша пікір алмасты.

ТҮРКПА Бас хатшысы, Елші Рамиль Гасанмен бірге кездесуге ТҮРКПА Бас хатшысының міндетін атқарушы Бектұр Базакечов, Хаттама қызметінің басшысы Ядигар Мамедов және құқықтық мәселелер жөніндегі қызметкер Азар Мамедов қатысты.