ТҮРКПА 14-ші Босфор саммитіне қатысты

2023 жылғы 16-17 қарашада ТҮРКПА Құқықтық мәселелер және халықаралық қатынастар жөніндегі комиссиясының Төрағасы Осман Местен мен Бас хатшы Мехмет Сүрейя Эр Ыстамбұлда өткен 14-ші Босфор саммитіне қатысты. «Келесі ғасырға бағдарлану: сынақтар мен уәделер» тақырыбымен UIP Халықаралық ынтымақтастық платформасы ұйымдастырған іс-шараға бизнес, саясат, ғылыми орта және мәдениетті қоса алғанда, әр түрлі саладағы көшбасшылар мен мамандар қатысты. Бас хатшы Мехмет Сүрейя Эр Саммит аясында ұйымдастырылған «Түркі әлемінің 100 жылдығы» атты пікірталасқа қатысып, Түркі одағы мәселесін салыстырмалы түрде талқылады және жылдан жылға кеңейіп, дамып келе жатқан ТҮРКПА қызметі туралы ақпарат берді. Түркия Ұлы Ұлттық Жиналысының депутаты, ТҮРКПА Құқықтық мәселелер және халықаралық қатынастар жөніндегі комиссиясының Төрағасы Осман Местен сол панельдің ашылуында сөз сөйлеп, ынтымақтастық институттары аясында Түркі ынтымақтастығының жаһандық ауқымдағы орнын талқылады. Панельде жақында дүниеден өткен Әзербайжан Парламентінің депутаты Ганире Пашаева да еске алынып, Түркиядағы жиналыста сөйлеген сөзінің түсірілімдері қатысушыларға ұсынылды. UIP Атқарушы кеңесінің мүшесі Гөзде Диздар модераторлық еткен панель платформаның негізін қалаушы Дженгиз Өзгенджилдің баяндамашыларға алғыс хаттарды, сондай-ақ олардың атынан естелік орманда отырғызылған ағаштарға қатысты құжаттарды тапсырумен аяқталды. Екі күнге созылған 14-ші Босфор саммитінде халықаралық қатынастар, қауіпсіздік, экономика, қаржы, инвестиция, банк ісі, спорт, білім, энергетика, климат, қоршаған орта, урбанизм, ауыл шаруашылығы, өнер, медиа, цифрлық трансформация, жасанды интеллект, киберқауіпсіздік, археология тарих, құқықтану және медицина салаларында 30-ға жуық панельдер өткізілді.