Түркиянын мурдагы элчиси Катчылыкка келди

2022-жылдын 16-февралында Түркиянын Азербайжан Республикасындагы мурдагы элчиси Хулуси Кылыч мырза Катчылыкка келип, Башкы катчы Мехмет Сүрейя Эр мырза менен жолугушту. Башкы катчы Кылыч мырзанын Катчылыкка келгенине кубанычын жана ыраазычылыгын билдирди. Тараптар Түрк мамлекеттеринин ортосундагы кызматташтыктын келечеги тууралуу пикир алмашышты. Жолугушуунун жүрүшүндө Хулуси Кылыч мырза Башкы катчыга 2021-жылы жарык көргөн Азербайжандын Улуу Жеңишинин даңктуу 44 күнүнө арналган китебин тапшырды. Китепте мурдагы элчинин Ата Мекендик согуш учурундагы маектери жана жеке ойлору камтылган. Хулуси Кылыч мырза 2008-2012-жылдары Түркия Республикасынын Азербайжан Республикасындагы Атайын жана Ыйгарым укуктуу Элчиси кызматында иштеген. 2012-жылы эки мамлекеттин ортосундагы эки тараптуу мамилелерди өнүктүрүүгө жана чыңдоого кошкон өзгөчө салымы үчүн Кылыч мырза Азербайжан Республикасынын Президенти Улуу Мартабалуу Илхам Алиев тарабынан Азербайжан Республикасынын эң жогорку мамлекеттик сыйлыгы «Достлуг» ордени менен сыйланган.