СКТР Парламентінің басшысы ТҮРКПА делегациясын қабылдады

2024 жылғы 14 қарашада Солтүстік Кипр Түрік Республикасы (СКТР) Ассамблеясының Төрағасы Зия Өзтүрклер СКТР-ның 41 жылдығына арналған мерекелік шараларға қатысу үшін сапармен келген ТҮРКПА Бас хатшысы Мехмет Сүрейя Эр бастаған делегацияны қабылдады. Бас хатшы Мехмет Сүрейя Эр СКТР-ның құрылғанына 41 жыл толуына орай елге келгеніне қуанышты екенін білдіріп, осы оқиғаға орай Кипр түрік халқын шын жүректен құттықтады. Бас хатшы Зия Өзтүрклерді СКТР Ассамблеясының Төрағасы болып сайлануымен құттықтады. СКТР-ның ТҮРКПА іс-шараларына қатысуы ынтымақтастыққа қолдау мен қуат бергенін атап өткен Бас хатшы «Тіл, идея және іс-әрекеттегі бірлік» ұранына сай СКТР-ның Түркі ынтымақтастығына қосқан үлесіне қанағаттанатынын жеткізді. Ол Парламент басшысын ТҮРКПА аясында атқарылып жатқан шаралар туралы хабардар етті. Парламент басшысы Зия Өзтүрклер кипрлік түріктердің осыдан 41 жыл бұрын күресінің ең мағыналы күндерінің бірін бастан өткергенін және тарихи парламент ғимаратында жиналыс өткізіп, СКТР жарияланғанын атап өтті. СКТР парламентінің 2023 жылы ТҮРКПА-ға бақылаушы ретінде қосылғанын айтқан Зия Өзтүрклер ТҮРКПА және Түркі мемлекеттері ұйымы сияқты халықаралық ұйымдарда СКТР өкілдігінің маңыздылығын білдірді. Парламент басшысы ТҮРКПА делегациясына мерекелік шараларға қатысқаны үшін алғысын айтты. СКТР сапары барысында Бас хатшы Мехмет Сүрейя Эрмен бірге ТҮРКПА Хатшылығының қызметкерлері Азар Мамадов пен Аласгар Агаев болды. Жиынға СКТР Ассамблеясының мүшесі Хасан Күчүк, СКТР Ассамблеясының Бас хатшысы Серал Фырат және СКТР Ассамблеясының Баспасөз, сыртқы байланыстар және хаттама директоры Милхан Лакадамьялы да қатысты.