Сарапшылар тобы Экономикалық ынтымақтастық жөніндегі комиссия шеңберінде «Экономикалық қызметтегі таза энергия туралы» модельдік заң жобасын әзірледі

«Экономикалық қызметтегі таза энергия туралы» модельдік заң жобасын әзірлеу жөніндегі сарапшылар тобы өздерінің үшінші қорытынды онлайн отырысын өткізді. «Экономикалық қызметтегі таза энергия туралы» модельдік заң жобасы ТҮРКПА-ның 2023-2028 жылдарға арналған Стратегиялық жол картасына сәйкес Экономикалық ынтымақтастық жөніндегі комиссия жұмысының 2025 жылға арналған жоспары шеңберінде әзірленді. ТҮРКПА мүше елдер мен Хатшылық өкілдерінен тұратын Сарапшылар тобы 2025 жылғы 21 қаңтарда алғашқы отырысын өткізді. Отырыстың ашылуында Бас хатшының орынбасары Талғат Адуов сөз сөйледі. Өз сөзінде Адуов мырза Түркі әлеміндегі интеграциялық процестерге жәрдемдесу үшін ТҮРКПА өңірінде ортақ құқықтық кеңістікті қалыптастырудың маңыздылығына тоқталды. Сарапшылар тобы аталған модельдік заң жобасын әзірлеу бойынша жалпы үш онлайн отырыс өткізді. Отырыстар құжат жобасы бойынша пікір алмасуға бағытталды. Модераторы Экономикалық ынтымақтастық жөніндегі комиссияның хатшысы Бауыржан Датқаев болған осы отырыстардың барысында сарапшылар аталған мәселе бойынша өздерінің сындарлы ұсыныстарын енгізді. Топ өзінің үшінші отырысында 2025 жылғы 25 ақпанда Түркияда өтетін Экономикалық ынтымақтастық жөніндегі комиссияның отырысында қарау үшін құжаттың соңғы нұсқасын пысықтап бітірді. «Экономикалық қызметтегі таза энергия туралы» модельдік заң жобасы ТҮРКПА мүше мемлекеттерінде Біріккен Ұлттар Ұйымының Климаттық өзгеру жөніндегі негіздемелік конвенциясы шеңберінде қабылданған Париж келісімінің ережелерінде белгіленген мақсаттарға қол жеткізу үшін экономикалық қызметтегі таза энергияны пайдалануды қолдау саласына байланысты қатынастарды реттеуге бағытталған.