Өзбекстан Парламентинин Сенатынын башчысы ТҮРКПА шайлоого байкоо жүргүзүү миссиясын кабыл алды

2024-жылдын 26-октябрында Өзбекстан Республикасынын Олий Мажлисинин Сенатынын Төрайымы Танзила Нарбаева Өзбекстандагы парламенттик шайлоого байкоо жүргүзүү процессине катышып жаткан ТҮРКПАнын Шайлоого байкоо жүргүзүү миссиясын кабыл алды. Танзила Нарбаева Миссияны жылуу кабыл алып, ТҮРКПА делегациясын эл аралык байкоочулардын катарында көрүү чоң сыймык экенин айтты. Жаңы аралаш шайлоо системасы менен өтүп жаткан парламенттик шайлоонун маанисин белгилеген Сенаттын Төрайымы аны маанилүү саясий окуя катары баалады. Миссиянын мүчөлөрү өздөрүнүн ишмердүүлүгү тууралуу маалымат беришип, алдыдагы шайлоону өткөрүүдө ийгиликтерди каалашты. Жолугушуунун жүрүшүндө түрк мамлекеттердин парламенттери менен өз ара кызматташууну мындан ары да өнүктүрүү жана Өзбекстандын ТҮРКПАнын ишмердүүлүгүнө катышуусуна байланыштуу маселелер да талкууланды. ТҮРКПАнын Шайлоого байкоо жүргүзүү миссиясынын курамына Азербайжан, Казакстан, Кыргызстан жана Түркиянын парламентарийлери – Ахлиман Амирасланов, Агалар Валиев (Азербайжан), Кудайберген Бексултанов (Казакстан), Азизбек Турсунбаев (Кыргызстан), Осман Местен, Махмут Рыдван Назырлы, Харун Өзгүр Йылдызлы, Филиз Кылыч, Өмер Фарук Гергерлиоглу (Түркия), ТҮРКПАнын Башкы катчысы Мехмет Сүрейя Эр, парламенттик кызматкерлер жана ТҮРКПА Катчылыгынын башка өкүлдөрү кирген. Миссияны Түркиянын Улуу Улуттук Жыйынынын мүчөсү Осман Местен жетектеди.