Өзбекстан Парламенті Сенатының Басшысы ТҮРКПА СБМ-ны қабылдады

2024 жылғы 26 қазанда Өзбекстан Республикасы Олий Мажлисі Сенатының Төрайымы Танзила Нарбаева Өзбекстандағы парламенттік сайлауды бақылау процесіне қатысып жатқан ТҮРКПА Сайлауды бақылау жөніндегі миссиясын қабылдады. Миссияны қарсы алған Танзила Нарбаева ТҮРКПА делегациясын халықаралық бақылаушылар қатарында көру үлкен мәртебе екенін айтты. Жаңа аралас сайлау жүйесі бойынша өтіп жатқан парламенттік сайлаудың маңыздылығын атап өткен Сенат Төрайымы оны маңызды саяси оқиға ретінде бағалады. Миссия мүшелері өз қызметі туралы хабардар етіп, алдағы сайлауды өткізуге сәттілік тіледі. Кездесу барысында Түркі мемлекеттерінің парламенттерімен өзара ынтымақтастықты одан әрі дамыту және Өзбекстанның ТҮРКПА қызметіне қатысу мәселелері де талқыланды. ТҮРКПА Сайлауды бақылау жөніндегі миссиясының құрамына Әзербайжан, Қазақстан, Қырғызстан және Түркия парламентшілері – Ахлиман Амирасланов, Агалар Валиев (Әзербайжан), Құдайберген Бексултанов (Қазақстан), Азизбек Турсунбаев (Қырғызстан), Осман Местен, Махмут Рыдван Назырлы, Харун Өзгүр Йылдызлы, Филиз Кылыч, Өмер Фарук Гергерлиоғлу (Түркия), ТҮРКПА Бас хатшысы Мехмет Сүрейя Эр, парламенттік қызметкерлер және ТҮРКПА Хатшылығының басқа да өкілдері қатысты. Миссияны Түркия Ұлы Ұлттық Жиналысының депутаты Осман Местен басқарды.