Моңғолия Парламентінің Төрағасы Бас хатшыны қабылдады

2023 жылғы 12 маусымда Моңғолияның Ұлы Мемлекеттік Хуралының (Парламентінің) Төрағасы Гомбожав Занданшатар 2023 жылғы 13-14 маусымда өтетін Тұрақты даму жөніндегі Транс-Алтай диалогына қатысу үшін Моңғолияның Ұлан-Батор қаласына сапары аясында Бас хатшы Мехмет Сүрейя Эр бастаған ТҮРКПА делегациясын қабылдады. Кездесуге Түркия Республикасының Моңғолиядағы Елшісі Зафер Атеш де қатысты. Парламент басшысы Моңғол және Түркі халықтарының тарихи және мәдени құндылықтарының жақын тамырларына, ортақтығына тоқталып, Моңғолияның Үшінші көршісінің саясаты шеңберінде Түркі мемлекеттерімен ынтымақтастықты дамытудың маңыздылығын атап өтті. Осы тұрғыда ол Түркі ынтымақтастығы платформасының барлық аспектілерімен ынтымақтасуға дайын екендігін білдірді. Бас хатшы тұрақты дамуға қол жеткізуге үлес қосу мақсатында Моңғолия Парламенті ұйымдастырған маңызды іс-шара болатын Тұрақты даму жөніндегі Транс-Алтай диалогына қатысуға шақырғаны және жылы қабылдағаны үшін алғысын білдірді. Ол Түркі әлеміндегі ынтымақтастық үдерістері туралы айтып, Түркі ынтымақтастығының парламенттік өлшемі ретіндегі ТҮРКПА қызметі туралы хабардар етті. Бас хатшы Ассамблеяның басқа парламенттермен және парламентаралық ұйымдармен өзара іс-қимылына тоқталды. Тараптар Моңғолия Парламенті мен ТҮРКПА арасындағы ынтымақтастықтың болашағы туралы, оның ішінде болашақта Ассамблеяда бақылаушы мәртебесін алу мүмкіндігі туралы пікір алмасты.