Казакстан Республикасынын Президенти ТҮРКПАнын делегациясын кабыл алды

2025-жылдын 12-июнунда Казакстан Республикасынын Президенти Касым-Жомарт Токаев Азербайжан Республикасынын Милли Межлисинин Төрайымы Сахиба Гафарова, Кыргыз Республикасынын Жогорку Кеңешинин Төрагасы Нурланбек Тургунбек улуу, Түркия Улуу Улуттук Жыйынынын Төрагасы Нуман Куртулмуш, Өзбекстан Республикасынын Олий Межлисинин Мыйзам чыгаруу палатасынын Төрагасы Нуриддин Исмоилов, Түндүк Кипр Түрк Республикасынын Жыйынынын Төрагасы Зия Өзтүрклер жана ТҮРКПАнын Башкы катчысы Мехмет Сүрейя Эрден турган ТҮРКПАнын делегациясын кабыл алды. Президент Касым-Жомарт Токаев ТҮРКПАнын 14-пленардык отурумуна катышуу үчүн Астана шаарына келген делегация мүчөлөрүн тосуп алды жана отурумдун жемиштүү өтөөрүнө ишенимин билдирди. Мамлекет башчысы Казакстандын Түрк мамлекеттеринин экономикалык, маданий жана гуманитардык өнүгүүсүнө өзгөчө таасир эткен маанилүү саясий институт болгон ТҮРКПАны толугу менен колдоорун билдирди. Ал Түрк дүйнөсүнүн жалпы максаттарына жетүүдө уюмдун мүмкүнчүлүктөрүн толук пайдалануу керектигин баса белгиледи. Президент акыркы жылдары Түрк кызматташтыгын тереңдетүүгө түрткү берген күчтүү бир катар маанилүү долбоорлор менен демилгелер ишке ашырылганын канааттануу менен белгиледи. Жыйынтыктап жатып, мамлекет башчысы бул жолугушуу дагы бир жолу Түрк дүйнөсүнүн мамлекеттеринин максаттарынын биримдигин, ошондой эле алардын ортосундагы ынтымакты сактоо жана чыңдоонун маанилүүлүгүн ачык көрсөтүп бергенин баса белгиледи. ТҮРКПА делегациясы жылуу кабыл алгандыгы үчүн ыраазычылык билдирип, Түрк дүйнөсүндөгү кызматташууну тереңдетүүгө жана байытууга болгон умтулуусун дагы бир жолу тастыктады.