Экономикалық ынтымақтастық жөніндегі комиссия өзінің он екінші отырысын өткізді

2025 жылғы 25 ақпанда Түркия Ұлы Ұлттық Жиналысының ұйымдастыруымен «Энергетикалық қауіпсіздік экономиканың тұрақты дамуының факторы ретінде» тақырыбында Экономикалық ынтымақтастық жөніндегі комиссияның он екінші отырысы онлайн форматта өтті. Отырыс Комиссияның Төрағасы, Қазақстан Республикасы Парламенті Мәжілісінің депутаты Анас Баққожаев мырзаның төрағалығымен өтті. Ашылу салтанатында Комиссия төрағасы Анас Баққожаев және Комиссияның басқа да мүшелері – Әзербайжан Республикасы Милли Меджлисінің депутаты Агалар Валиев, Қырғыз Республикасы Жогорку Кенешінің депутаты Дастанбек Джумабеков, Түркия Ұлы Ұлттық Жиналысының депутаттары Махмут Рыдван Назырлы мен Харун Өзгюр Йылдызлы сөз сөйледі. Комиссия мүшелері сөз сөйлеген соң күн тәртібіндегі мәселелерді талқылап, отырыстың негізгі тақырыбы бойынша пікір алмасты. ТҮРКПА аймағында энергетика саласындағы ынтымақтастықты нығайтудың, тәжірибе алмасудың және тұрақты энергетикалық инфрақұрылымды құрудың маңыздылығына назар аударып, қатысушылар Түркі әлеміндегі энергетикалық қауіпсіздіктің берік негізін қалау үшін мүше парламенттердің өз елдеріндегі сыртқы және ішкі қауіп-қатерлерге төзімді тұрақты энергетикалық жүйелерді құрудағы рөлін атап өтті. Комиссия 2025 жылғы 11-12 маусымда Қазақстанның Астана қаласында өтетін ТҮРКПА-ның он төртінші пленарлық отырысында ұсынылатын Комиссия шеңберінде әзірленген «Экономикалық қызметтегі таза энергия туралы» модельдік заң жобасымен бірге негізгі тармақ бойынша есеп пен ұсынымдарды талқылап, мақұлдады. Комиссия келесі отырысын 2026 жылы Әзербайжанда «ТҮРКПА-ға мүше мемлекеттердің бірлескен экономикалық қызметін жүргізудің нақты жағдайлары мен перспективалары» негізгі тақырыбы бойынша өткізу туралы және 2026 жылғы Комиссия жұмысының жоспары шеңберінде 2023-2028 жылдарға арналған Стратегиялық жол картасында белгіленген «Бірлескен кәсіпорын туралы» модельдік заң жобасын әзірлеу туралы шешім қабылдады.