"Экологиялык билим берүү жана калкты агартуу жөнүндө" моделдик мыйзамды иштеп чыгуу боюнча талкуулар аяктады

ТҮРКПАнын Айлана-чөйрө, табигый ресурстар жана саламаттыкты сактоо боюнча комиссиясынын алкагындагы "Экологиялык билим берүү жана калкты агартуу жөнүндө" моделдик мыйзамдын долбоорун иштеп чыгуу боюнча эксперттик топтун жыйыны аяктады. Мүчө мамлекеттердин өкүлдөрүнөн турган эксперттик топ 2025-жылдын 31-январында жана 21-февралында болуп өткөн онлайн-жыйындардын жүрүшүндө чогулушту. "Экологиялык билим берүү жана калкты агартуу жөнүндө" моделдик мыйзамдын долбоору ТҮРКПАнын 2023-2028-жылдарга карата стратегиялык жол картасына ылайык иштелип чыккан. Моделдик закон Азербайжандын, Казакстандын, Кыргыз Республикасынын жана Түркиянын улуттук мыйзам чыгаруу системаларынын негизги укуктук базасына негизделген. Ошентип, бул документти иштеп чыгууда мүчө мамлекеттердин колдонуудагы мыйзамдары, ар кайсы өлкөлөрдө колдонулуп жаткан окшош мыйзамдар, ошондой эле башка ченемдик-укуктук документтер менен байланышкан тажрыйбалар иликтенди. Моделдик мыйзамдын долбоору айлана-чөйрөнү коргоо жана жаратылыш ресурстарын натыйжалуу пайдалануу боюнча жүрүм-турум нормаларын жана атайын билимдерди калыптандырууга багытталган тажрыйба алмашуу жана окутуу процесси үчүн маанилүү укуктук инструмент катары иштеп чыгуу тиешелүү чөйрөдөгү укуктук айырмачылыктарды жоюуну көздөйт. Мүчө мамлекеттердин өкүлдөрүнүн жана ТҮРКПАнын Катчылыгынын өкүлдөрүнүн катышуусунда өткөрүлгөн эксперттер тобунун жолугушууларында тараптар өз ара пикир алмашып, моделдик мыйзамдын долбоору боюнча кеңештер жана сунуштарды беришти. Азербайжан Республикасынын Милли Межлиси тарабынан иштелип чыккан моделдик мыйзам долбоорунун акыркы үлгүсү комиссиянын 10-жыйынына сунушталат. Жыйындарды комиссиянын катчысы Айнура Абуталибова алып барды.