Бакуде ТҮРКПА Жас парламентшілер тобының үшінші отырысы өтті

2024 жылғы 5 маусымда Бакуде ТҮРКПА-ның Он үшінші Пленарлық отырысы аясында «ТҮРКПА-ға мүше мемлекеттер жастарының дене және психикалық мәселелері» атты Жас парламентшілер тобының үшінші отырысы өтті. Іс-шараға ТҮРКПА-ға мүше мемлекеттер мен бақылаушы ретінде Солтүстік Кипр Түрік Республикасының (СКТР) парламентшілері жиналды. Жиналысқа Топ жетекшісі, Түркия Ұлы Ұлттық Жиналысының депутаты Эмре Чалышкан төрағалық етті. Өзінің кіріспе сөзінде Топ жетекшісі кездесуді ұйымдастырғаны үшін Милли Меджлиске алғысын білдіріп, осы кездесу болашақтың кепілі болып табылатын жастардың денсаулық сақтау саясаты мен іс-әрекетін бағалауға тамаша мүмкіндік болатынына сенім білдірді. Отырыста Әзербайжан Республикасы Милли Меджлисінің мүшелері Анар Мамедов пен Алиаббас Салахзаде, Қырғыз Республикасы Жогорку Кенешінің депутаты Кубанычбек Самаков, СКТР Ассамблеясының депутаты Фиде Куршат сөз сөйледі. Жастар арасында өсіп келе жатқан семіздік, нашақорлық, дұрыс тамақтанбау, отырықшы өмір салты және жұқпалы аурулар сияқты денсаулық сақтау мәселелеріне тоқтала отырып, Чалышан мырза денсаулықты сақтау және ТҮРКПА-ға мүше мемлекеттердің жастарының мүмкіндіктерін жақсарту шаралары бойынша одан әрі ынтымақтастық қажет екенін атап өтті. Осыған байланысты жастардың денсаулығын сақтау мәселелерін түсіну және салауатты өмір салтын қолдау әрі насихаттау мақсатында жүзеге асырылып жатқан саясат пен бағдарламалар туралы пікір алмасылды. Ол жастардың салауатты өмір салтын ұстануы үшін алдағы уақытта да бірлесіп жұмыс істейтініне сенім білдірді. Топ өзінің тиісті есебі мен ұсынымдарын қабылдады және ТҮРКПА-ның Он төртінші Пленарлық отырысы аясында Қазақстан Республикасында өтетін Төртінші отырысының тақырыбын белгіледі.