Бакуде ТҮРКПА-ның Он үшінші Пленарлық отырысы өтті

2024 жылғы 6 маусымда Бакуде Әзербайжан Республикасының Милли Меджлисі ұйымдастырған ТҮРКПА-ның Он үшінші Пленарлық отырысы өтті. Пленарлық отырыстың тақырыбы «Түркі әлемі үшін «жасыл» көкжиектер: «жасыл» күн тәртібіне қол жеткізудегі парламенттердің рөлі» болды. Іс-шараға мүше және бақылаушы парламенттердің делегациялары, сондай-ақ Өзбекстан Республикасы Олий Мажлисінің делегациялары, Түркі мемлекеттері ұйымы (ТМҰ), Түркі мәдениеті ұйымы (ТҮРКСОЙ), Түркі академиясы, Түркі мәдениеті мен мұрасы қоры, Қосылмау Қозғалысының Парламенттік Желісі (ҚҚПЖ), Қара теңіз экономикалық ынтымақтастығы Парламенттік ассамблеясы (ҚТЭЫПА), ИЫҰ-ға мүше мемлекеттердің Парламенттік одағы (ИЫҰПО) , Азиядағы өзара іс-қимыл және сенім шаралары жөніндегі кеңес (АӨСШК), ТМД Парламентаралық Ассамблеясы (ТМД ПАА), Азық-түлік қауіпсіздігі жөніндегі Ислам ұйымы (АҚИҰ), Түркі әлемі сәулетшілер мен инженерлер одағы (ТӘСИО), Қырғыз-түрік «Манас» университеті және ТМД ПАА IIMDD Баку филиалы сияқты Түркі ынтымақтастығы ұйымдарының, бақылаушы ұйымдардың және басқа да халықаралық ұйым мен институттардың басшылары мен өкілдері қатысты. ТҮРКПА-ның Іс басындағы Төрайымы, Әзербайжан Республикасы Милли Меджлисінің Төрайымы Сагиба Гафарова алғы сөзін сөйледі. Пленарлық отырыс барысында мүше парламенттердің басшылары – Қазақстан Республикасы Парламенті Мәжілісінің Төрағасы Ерлан Қошанов, Қырғыз Республикасы Жогорку Кенешінің Төрағасы Нурланбек Шакиев, Түркия Ұлы Ұлттық Жиналысының Төрағасы Нуман Куртулмуш, сондай-ақ бақылаушы ретінде Мажарстан Мемлекеттік Жиналысы Төрағасының орынбасары Марта Матрай мен Солтүстік Кипр Түрік Республикасы Ассамблеясының Спикері Зорлу Төре, қонақ ретінде Өзбекстан Республикасы Олий Мажлисі Сенатының Төрайымы Танзила Нарбаева сөз сөйледі. Он үшінші Пленарлық отырыстың күн тәртібінде тұрақты комиссиялардың есептері мен ұсынымдарын, «Дербес деректерді қорғау туралы», «Еңбек нарығының талаптарына сәйкес кадрларды даярлау туралы», «Темекі бұйымдарын пайдалануды шектеу туралы», «Сауда өкілдіктері туралы» және «Айналымға шығарылатын өнімдердің қауіпсіздігі мен сапасының негіздері туралы» модельдік заңдарды, ТҮРКПА Сайлау мен референдумды бақылау миссияларының қорытынды есептерін қарау және қабылдау, тұрақты комиссияларының төрағалары мен төраға орынбасарларын және ТҮРКПА Бас хатшысының орынбасарын сайлау болды. Ассамблея пленарлық отырыс барысында ұсынылған Парламентші әйелдер тобының және Жас парламентшілер тобының есептері мен ұсынымдарын назарға алды. Он төртінші Пленарлық отырысты 2025 жылы Қазақстан Республикасында өткізу туралы шешім қабылданды. Он үшінші Пленарлық отырыс Баку декларациясының қабылдануымен аяқталды. Он үшінші Пленарлық отырыс парламенттік делегациялар басшыларының қатысуымен өткен баспасөз брифингімен жалғасты.