Әзербайжан Сыртқы істер министрлігі Ханкенди мен Шушаға сапар ұйымдастырды

2025 жылғы 18 сәуірде ТҮРКПА Бас хатшысы Мехмет Сүрейя Эр Әзербайжанда аккредиттелген дипломатиялық корпус пен халықаралық ұйымдардың өкілдері үшін Әзербайжан Республикасының Сыртқы істер министрлігі ұйымдастырған Әзербайжанның Ханкенди және Шуша қалаларына сапарына қатысты. Сапарға Әзербайжанда аккредиттелген 33 мемлекет пен 7 халықаралық ұйымның 100-ден астам дипломаттары мен әскери атташелері қатысты. Сапардың мақсаты шетелдік дипломаттарды Ханкенди, Шуша қалаларында жүргізіліп жатқан қалпына келтіру және қайта құру жұмыстарымен және Қарабақ университетінде студенттерге жасалған жағдаймен таныстыру болды. Делегация алдымен Қарабақ университетіне бет алды. Қарабақ университетіне сапары барысында Президенттің көмекшісі, Президент Әкімшілігінің Сыртқы саясат бөлімінің меңгерушісі Хикмат Гаджиев, Әзербайжан Республикасы Президентінің Ханкенди қаласындағы, Агдара және Ходжалы аудандарындағы арнайы өкілі Эльчин Юсубов, Президенттің Ағдам, Фузули және Ходжаванд аудандарындағы арнайы өкілі Эмин Гусейнов баяндама жасап, негізгі дамулар мен перспективаларды білдірді. Гаджиев мырза қатысушыларды армян-әзербайжан қақтығысының тарихи тамыры және Арменияның бұрын оккупацияланған аумақтарда жасаған әскери қылмыстары туралы хабардар етті. Ол Әзербайжанның халықаралық қағидаттарды басшылыққа ала отырып, өзінің аумақтық тұтастығы мен егемендігін қалпына келтіргенін баса айтты. Юсубов өз сөзінде азат етілген аумақтарда ауқымды құрылыс, қалпына келтіру жұмыстары жүргізіліп, заманауи жолдар салынып, елді мекендер электр жарығымен, ауыз сумен, көгілдір отынмен қамтылып жатқанын, Ханкендиде және басқа да елді мекендерде кәсіпкерлерге қолайлы жағдай жасалып жатқанын жеткізді. Қарабақ университетінің Ректоры Шахин Байрамов университеттің қызметі, оқу үдерісіндегі жетістіктер мен алға қойылған мақсаттарға тоқталды. Делегация Қарабақ университетімен танысты, оқу корпусын, кітапхананы, оқу кабинеттерін, зертханаларды, көрме залын аралады, музыкалық қойылымдарды тамашалады, Ханкендидегі Жеңіс саябағын аралады. Одан кейін делегация Әзербайжан тарихы мен мәдениетінің символы Шуша қаласында болды. Әзербайжан Президентінің Шуша ауданындағы арнайы өкілі Айдын Керимов қаланың тарихы, оккупация кезеңіндегі жағдайы, жүргізіліп жатқан құрылыс жұмыстары туралы қысқаша мәлімет берді. Ол 30 жылға жуық жаулап алу кезінде Шушадағы тарихи ғимараттар, мешіттер, ескерткіштер армяндардың салдарынан вандализмге ұшырағанын атап өтті. Шуша басқыншылардан азат етілгеннен кейін ауқымды қалпына келтіру және құрылыс жұмыстары басталды. Сапар аясында дипломатиялық корпус пен халықаралық ұйымдар өкілдеріне Шуша қаласындағы Қарабақ көшесінің бойында жүргізіліп жатқан құрылыс жұмыстары туралы баяндалды. Делегация реставрация жұмыстары сәтті аяқталған «Ашағы Говхар аға» мешітінде болды, сондай-ақ 2021 жылы іргетасы қаланған Шуша қаласында салынған алғашқы тұрғын үй кешенін және 2025 жылдың 10 мамырына ресми ашылу рәсімі жоспарланған ғимаратты аралады. Сапар «Иса бұлағы» демалыс кешенін аралаумен аяқталды. Бас хатшы Мехмет Сүрейя Эрмен бірге Білім, мәдениет, әлеуметтік және гуманитарлық мәселелер жөніндегі комиссия хатшысының міндетін атқарушы Әйгерім Таалайбекова да барды. Ханкенди Қарабақтың құрамдас бөлігі ретінде тек Әзербайжан үшін ғана емес, бүкіл Түркі әлемі үшін ерекше маңызға ие болды. Әзербайжанның қол астындағы қаланың қайтарылуы тарихи әділеттіліктің қалпына келуі мен Түркі халықтары арасындағы бірліктің нығаюының символына айналды. Инфрақұрылымның ауқымды дамуы, негізгі жобалардың жүзеге асуы Ханкенди өңірдің маңызды мәдени-ағарту орталығына айналдыруда. Мұнда Түркі құндылықтары, тілі, тарихы, бір-біріне қолдау көрсету рухы жаңғырып келеді.