Астанада Халықаралық еріктілер форумы өтті

2023 жылғы 20-21 маусымда Бас хатшы Мехмет Сүрейя Эр бастаған ТҮРКПА делегациясы Астанада Қазақстан Республикасы Ақпарат және әлеуметтік даму министрлігі ұйымдастырған Халықаралық еріктілер форумына қатысты. Іс-шараға 34 елден қатысушылар, атап айтқанда, ресми тұлғалар, халықаралық ұйымдардың басшылары мен өкілдері, парламентшілер, ҮЕҰ өкілдері қатысты. Бас хатшы Мехмет Сүрейя Эр «Еріктілер қозғалысының аймақтық шоғырлануы» атты сессияда сөз сөйледі. Бас хатшы еріктілер қозғалысын қазіргі әлеуметтік шындықтың феномені ретінде атап өтіп, еріктілер қозғалысының даму перспективалары жаһандық тенденциялар мен сын-қатерлер аясында кеңейіп келе жатқанын білдірді. Осы тұрғыда ол еріктілер қызметін мемлекеттердің дамуындағы маңызды ресурс ретінде бағалады. Волонтерлік қызметтің ізгі ниет, волонтерлік және өзара көмек көрсету дәстүрлері бар Түркі халықтарының ұлттық сипаты мен менталитетіне сәйкестігін белігілеп, Бас хатшы Түркі халықтарының құндылықтары Түркі мемлекеттерінде еріктілер қызметін одан әрі дамытуға ықпал ететінін атап өтті. Форумда волонтерлік қызметтің түрлі бағыттарына басты назар аударылды. Қатысушылар өсіп келе жатқан жаһандық экологиялық апаттар дәуірінде экология және жануарларды қорғау саласындағы еріктілердің ерекше рөлін атап өтті. Форумға қатысушыларға азаматтарды экология саласындағы волонтерлік қызметке тартуға бағытталған «Біргеміз: Таза Әлем» ұлттық жобасы туралы ақпарат берілді. 21 маусымда форумның пленарлық отырысы Қазақстан Республикасының Президенті Қасым-Жомарт Тоқаевтың алғы сөзінен басталды. Мемлекет басшысы өз сөзінде мемлекет пен қоғам арасындағы сенімді әріптестіктің маңыздылығын атап өтіп, елдегі еріктілік пен қайырымдылық дәстүрлерін нығайту бойынша бірқатар кешенді қадамдарды ұсынды. Әзербайжан, Қазақстан, Қырғызстан, Түркия, Өзбекстан және Тәжікстан арасында волонтерлік саласындағы Өзара түсіністік пен ынтымақтастық туралы меморандумға қол қойылды. Форум Қазақстан Республикасы Ақпарат және әлеуметтік даму министрлігі мен Біріккен Ұлттар Ұйымының Еріктілер бағдарламасы (БҰҰЕБ) арасындағы толық қаржыландыру бағдарламасын іске асыру туралы келісімге қол қою рәсімімен аяқталды. 2023 жылғы 20 маусымда Халықаралық еріктілер форумы аясында Бас хатшы Мехмет Сүрейя Эр Қазақстан Республикасының Ақпарат және әлеуметтік даму министрі Дархан Қыдырәлімен кездесті. Сапары үшін алғыс білдірген Министр Қыдырәлі Бас хатшыны Министрліктің қызметі, ағымдағы жобалар, сондай-ақ жастар саясаты мен ақпараттық технологияларға қатысты жақында қабылданған заңдар туралы хабардар етті. Қыдырәлі мырза Халықаралық еріктілер форумының әртүрлі елдер мен өңірлерден келген еріктілер арасында тәжірибе мен білім алмасудың бірегей платформасы ретіндегі маңыздылығын атап өтті. Бас хатшы жылы қонақжайлылық үшін алғысын білдіріп, Министрге Ассамблеяның ағымдағы қызметі туралы хабардар етті. Тараптар ынтымақтастықты одан әрі нығайтуға дайын екендіктерін білдірді.