Астанада ТҮРКПАнын Он төртүнчү пленардык отуруму өттү

2025-жылдын 12-июнунда Казакстан Республикасынын Парламенти тарабынан уюштурулган ТҮРКПАнын Он төртүнчү пленардык отуруму Астанада орун алды. Пленардык отурум "Түрк доору: парламенттик дипломатиянын ролу" деген теманын астында өттү. Иш-чарага мүчө жана байкоочу парламенттердин делегациялары, ошондой эле Өзбекстан Республикасынын Олий Мажлиси конок катары, Түрк кызматташтык уюмдарынын, байкоочу уюмдардын жана башка мекемелердин, алардын катарында Түрк Мамлекеттер Уюму (ТМУ), Түрк Академиясы, Түрк маданияты жана мурасы фонду, Кара Деңиз Экономикалык Кызматташтык Уюмунун Парламенттик Ассамблеясы (КДЭКУ ПА), Ислам Кызматташтык Уюмуна мүчө мамлекеттердин Парламенттик Биримдиги (ИКУ ПБ), Азиядагы Өз ара Аракеттенүү жана Ишеним Чаралары Боюнча Кеңешме (АӨИЧК), Көз Карандысыз Мамлекеттер Шериктештигине мүчө Мамлекеттердин Парламенттер аралык Ассамблеясынын (КМШ ПА), Азык-түлүк коопсуздугу боюнча Ислам уюму (АКИУ), Кыргыз-Түрк "Манас" университети жана Ахмет Яссави университетинин жетекчилери жана өкүлдөрү катышты. Иш-чара ТҮРКПАнын учурдагы Төрагасы, Казакстан Республикасынын Парламентинин Мажилисинин Төрагасы Ерлан Кошановдун жана Казакстан Республикасынын Парламентинин Сенатынын Төрагасы Маулен Ашимбаевдин ачылыш сөздөрү менен башталды. Парламенттердин башчылары – Азербайжан Республикасынын Милли Межлисинин Төрайымы Сахиба Гафарова, Кыргыз Республикасынын Жогорку Кеңешинин Төрагасы Нурланбек Тургунбек уулу, Түркиянын Улуу Улуттук Жыйынынын Төрагасы Нуман Куртулмуш, ошондой эле байкоочу тарап катары Түндүк Кипр Түрк Республикасынын Жыйынынын Төрагасы Зия Өзтүрклер жана Өзбекстан Республикасынын Олий Мажлисинин Мыйзам чыгаруу палатасынын Төрагасы Нуриддин Исмоилов жана башка катышуучулар пленардык отурумда сөз сүйлөштү. Он төртүнчү пленардык отурумдун күн тартиби туруктуу комиссиялардын отчетторун жана сунуштамаларын, "ТҮРКПАга мүчө өлкөлөрдө жашап туруу уруксатын алууну жеңилдетүү жөнүндө", "Мугалимдин статусу жөнүндө", "Экономикалык ишмердүүлүктөгү таза энергия жөнүндө" жана "Экологиялык билим берүү жана калкты агартуу жөнүндө" аталышындагы моделдик мыйзамдарды, ТҮРКПАнын Шайлоого байкоо жүргүзүү миссияларынын акыркы отчетторун, 2026-каржы жылына карата бюджетти кабыл алуу, туруктуу комиссиялардын Төрагаларынын орун басарларын, ТҮРКПАнын Башкы катчысын жана Башкы катчынын орун басарын шайлоону камтыды. Азербайжан Республикасынын Милли Межлиси тарабынан көрсөтүлгөн Рамил Хасан мырза ТҮРКПАнын Башкы катчысы кызматына, ал эми Түркиянын Улуу Улуттук Жыйыны тарабынан көрсөтүлгөн Мухаммет Алпер Хаяли мырза ТҮРКПАнын Башкы катчысынын орун басары кызмат ордуна шайланышты. Азербайжан Республикасынын Милли Межлисинин мүчөсү Гүнай Эфендиева айым ТҮРКПАнын Билим берүү, маданий, социалдык жана гуманитардык маселелер боюнча комиссиясынын Төрагасынын орун басары, ал эми Кыргыз Республикасынын Жогорку Кеңешинин мүчөсү Чолпон Султанбекова айым ТҮРКПАнын Экономикалык кызматташтык боюнча комиссиясынын Төрагасынын орун басары болуп шайланды. Ассамблея ошондой эле пленардык отурумда баяндалган Аял парламентарийлер тобунун жана Жаш парламентарийлер тобунун отчетторуна жана сунуштамаларына көңүл бурду. 2026-жылы Он бешинчи пленардык отурумду Кыргыз Республикасында өткөрүү чечими кабыл алынды. Он төртүнчү пленардык отурум Астана декларациясынын кабыл алынышы менен жыйынтыкталды. Он төртүнчү пленардык отурум мүчө парламенттердин Төрагаларынын катышуусунда басма сөз жыйынынын өтүшү менен коштолду.