Астанада ТҮРКПА-ның он төртінші пленарлық отырысы өтті

2025 жылғы 12 маусымда Астанада Қазақстан Республикасы Парламентінің ұйымдастыруымен ТҮРКПА-ның он төртінші пленарлық отырысы өтті. Пленарлық отырыс «TURKTIME: Парламенттік дипломатияның рөлі» тақырыбымен өтті. Іс-шараға мүше және бақылаушы парламенттердің, сондай-ақ қонақ ретінде Өзбекстан Республикасы Олий Мажлисінің делегациялары, Түркі мемлекеттері ұйымы (ТМҰ), Түркі академиясы, Түркі мәдениеті мен мұрасы қоры, Қара теңіз экономикалық ынтымақтастығының Парламенттік Ассамблеясы (ҚТЭЫ ПА), ИЫҰ-ға мүше елдер Парламенттік Одағы (ИЫҰ ПО), Азиядағы өзара іс-қимыл және сенім шаралары кеңесінің (АӨСШК), ТМД Парламентаралық Ассамблеясы (ТМД ПАА), Азық-түлік қауіпсіздігі жөніндегі Ислам ұйымы (АҚИҰ), Қырғыз-Түрік «Манас» университеті және Ахмет Яссауи университеті сияқты Түркі ынтымақтастығы ұйымдарының, бақылаушы ұйымдардың және басқа да институттардың басшылары мен өкілдері жиналды. Шара ТҮРКПА-ның Іс басындағы Төрағасы, Қазақстан Республикасы Парламенті Мәжілісінің Төрағасы Ерлан Қошанов пен Қазақстан Республикасы Парламенті Сенатының Төрағасы Мәулен Әшімбаевтың сәлемдеме сөздерімен басталды. Пленарлық отырыста мүше парламенттердiң басшылары – Әзербайжан Республикасы Милли Меджлисiнiң Төрайымы Сагиба Гафарова, Қырғыз Республикасы Жогорку Кенешiнiң Төрағасы Нурланбек Тургунбек уулу, Түркия Ұлы Ұлттық Мәжілісінің Төрағасы Нуман Куртулмуш, сондай-ақ бақылаушы ретінде Солтүстік Кипр Түрiк Республикасы Ассамблеясының Төрағасы Зия Өзтүрклер мен Өзбекстан Республикасы Олий Мажлисінің Заң шығару палатасының Төрағасы Нуриддин Исмоилов және басқа да қатысушылар сөз сөйледі. Он төртінші пленарлық отырыстың күн тәртібіне тұрақты комиссиялардың есептері мен ұсынымдарын, «ТҮРКПА-ға мүше елдерде тұруға рұқсат беруді жеңілдету туралы», «Мұғалім мәртебесі туралы», «Экономикалық қызметтегі таза энергия туралы» және «Халыққа экологиялық білім беру және ағарту туралы» модельдік заңдарды, ТҮРКПА-ның сайлауды бақылау миссияларының қорытынды есептерін, ТҮРКПА-ның 2026-шы қаржы жылының бюджетін қабылдау, тұрақты комиссиялар төрағаларының орынбасарларын, ТҮРКПА Бас хатшысын және Бас хатшысының орынбасарын сайлау кірді. ТҮРКПА Бас хатшысы болып кандидатурасын Әзербайжан Республикасының Милли Меджлисі ұсынған Рамиль Гасан, ТҮРКПА Бас хатшысының орынбасары болып кандидатурасын Түркия Ұлы Ұлттық Мәжілісі ұсынған Мұхаммет Альпер Хаяли сайланды. ТҮРКПА Білім, мәдениет, әлеуметтік және гуманитарлық мәселелер жөніндегі комиссиясы төрағасының орынбасары болып Әзербайжан Республикасы Милли Меджлисінің депутаты Гүнай Афандиева, ТҮРКПА Экономикалық ынтымақтастық жөніндегі комиссиясы төрағасының орынбасары болып Қырғыз Республикасы Жогорку Кенешінің депутаты Чолпон Султанбекова сайланды. Ассамблея Пленарлық отырыс барысында ұсынылған Парламентші әйелдер тобының және Жас парламентшілер тобының есептері мен ұсыныстарын да назарға алды. Он бесінші пленарлық отырысты 2026 жылы Қырғыз Республикасында өткізу туралы шешім қабылданды. Он төртінші пленарлық отырыс Астана декларациясын қабылдаумен аяқталды. Он төртінші пленарлық отырыс мүше парламенттер басшыларының қатысуымен өткен баспасөз брифингімен жалғасты.