Астанада Эл аралык ыктыярчылар форуму өттү

2023-жылдын 20-21-июнунда ТҮРКПАнын Башкы катчысы Мехмет Сүрейя Эр жетектеген делегация Астанада Казакстан Республикасынын Маалымат жана социалдык өнүктүрүү министрлиги тарабынан уюштурулган Эл аралык ыктыярчылар форумуна катышты. Иш-чарага дүйнөнүн 34 мамлекетинен келген катышуучулар, атап айтканда, расмий адамдар, эл аралык уюмдардын жетекчилери жана өкүлдөрү, парламентарийлер, бейөкмөт уюмдардын өкүлдөрү катышты. Башкы катчы Мехмет Сүрейя Эр “Ыктыярчылар кыймылынын регионалдык консолидациясы” аттуу сессияда сөз сүйлөдү. Башкы катчы ыктыярчылык кыймылын заманбап социалдык реалдуулуктун феномени катары атап, ыктыярчылык кыймылынын өнүгүү келечеги дүйнөлүк тенденциялардын жана чакырыктардын фонунда өсүп жатканын белгиледи. Бул контекстте ал ыктыярчылардын ишмердүүлүгүн мамлекеттердин өнүгүүсүндөгү өтө маанилүү ресурс катары баалады. Кайрымдуулук, ыктыярчылык жана өз ара жардамдашуу сыяктуу кылымдардан бери сакталып келген салттарга ээ түрк элдеринин улуттук мүнөзүнө жана менталитетине ыктыярчылык ишмердүүлүгү жакын экендигин белгилеп, Башкы катчы түрк элдеринин баалуулуктары түрк мамлекеттеринде ыктыярчылык ишмердүүлүгүнүн мындан аркы өнүгүшүнө түрткү болгонун баса белгиледи. Форумда ыктыярчылык ишмердүүлүгүнүн түрдүү багыттары талкууланды. Катышуучулар глобалдык экологиялык кырсыктар күчөгөн доордо жаратылышты жана жаныбарларды коргоо жаатындагы ыктыярчылардын өзгөчө ролун белгилеп кетишти. Форумдун катышуучуларына жарандарды экология тармагындагы ыктыярчылык ишмердүүлүгүнө тартууга багытталган “Биргебиз: Таза дүйнө” улуттук долбоору тууралуу маалымат берилди. 21-июнда Казакстан Республикасынын Президенти Касым-Жомарт Токаевдин ачылыш сөзү менен форумдун пленардык жыйыны башталды. Өз сөзүндө мамлекет башчы мамлекет менен коомдун ишенимдүү өнөктөштүгүнүн маанилүүлүгүн баса белгилеп, өлкөдө ыктыярчылык жана кайрымдуулук салттарын бекемдөө боюнча бир катар комплекстүү кадамдарды сунуштады. Азербайджан, Казакстан, Кыргызстан, Түркия, Өзбекстан жана Тажикстандын ортосунда ыктыярчылык иш боюнча өз ара түшүнүшүү жана кызматташтык меморандумуна кол коюлду. Форум Казакстан Республикасынын Маалымат жана социалдык өнүктүрүү министрлиги менен Бириккен Улуттар Уюмунун Ыктыярчылар программасынын (БУУЫ) ортосундагы толук каржылоо программасын ишке ашыруу боюнча макулдашууга кол коюу аземи менен жыйынтыкталды. 2023-жылдын 20-июнунда Эл аралык ыктыярчылар форумунун алкагында Башкы катчы Мехмет Сүрейя Эр Казакстан Республикасынын Маалымат жана социалдык өнүктүрүү министри Дархан Кыдырали менен жолугушту. Министр Кыдырали Башкы катчыга жасаган сапары үчүн ыраазычылык билдирип, Министрликтин ишмердүүлүгү, ишке ашырылып жаткан долбоорлор, ошондой эле жаштар саясаты жана маалыматтык технологияларга байланыштуу жакында кабыл алынган мыйзамдар тууралуу маалымат берди. Кыдырали мырза Эл аралык ыктыярчылар форумунун ар кайсы өлкөлөрдөн жана региондордон келген ыктыярчылар ортосунда тажрыйба алмашуу жана билим алмашуу үчүн уникалдуу аянтча катары маанилүүлүгүн белгиледи. Башкы катчы Министрге жылуу меймандостук үчүн ыраазычылык билдирип, Ассамблеянын учурдагы ишмердүүлүгү тууралуу маалымат берди. Тараптар кызматташтыкты мындан ары да бекемдөөгө даяр экендиктерин билдиришти.