Анталияда ТҮРКПА мүше парламенттерінің тұрақты комитеттерінің отырысы өтті

2023 жылғы 22-23 қарашада ТҮРКПА Хатшылығының делегаттары Анталиядағы Түркияның Ұлы Ұлттық Жиналысы (ТҰҰЖ) ұйымдастырған «Әйелдер мен ерлер үшін тең мүмкіндіктерді қамтамасыз ету және құқықтар мен мүмкіндіктерді кеңейту» атты мүше парламенттердің тұрақты комитеттерінің отырысына қатысты. Отырыс ТҰҰЖ Әйелдер мен ерлер үшін тең мүмкіндіктер бойынша комитетінің Төрайымы Чиғдем Ердоған Атабектің төрағалығымен өтті. Іс-шарада сөз сөйлеген Комитет Төрайымы Түркі әлеміндегі бірлік пен ынтымақтастықты нығайтудың тиімді тұғыры ретінде ТҮРКПА аясында жүргізіліп жатқан жұмыстың маңыздылығын атап өтті. Сонымен бірге, ол мұндай кездесулер әйелдер құқығын қорғау саласындағы мүше елдердің парламенттері арасындағы ынтымақтастықты одан әрі дамытуға ықпал ететініне сенім білдірді. Кездесуде әйелдердің шешім қабылдау тетіктеріне қатысуына, әйелдердің білім беру саласындағы мүмкіндіктерін кеңейтудің маңыздылығына, әйелдердің мемлекеттік және жеке секторлардағы тең экономикалық мүмкіндіктерге қол жеткізу проблемалары мен мүмкіндіктеріне баса назар аударылды. Әзербайжан Республикасы Милли Меджлисінің Отбасы, әйелдер және балалар істері комитетінің Төрайымы Хижран Гусейнова, Қырғыз Республикасы Жогорку Кенешінің депутаттары Гуля Кожокулова және Гүлшаркан Култаева, ТҰҰЖ мүшелері Чиғдем Конджагүл, Суна Кеполу Атаман, Туба Вурал Чокал, Фатма Экмекчи, Айше Сибел Ерсой, Шенол Сунат, Пелин Йылык, ТҰҰЖ Бас хатшысының орынбасары Кюбра Теймур, Өзбекстан Республикасы Олий Мажлисі Сенатының мүшелері Манзура Салимова, Абира Хусейнова, Өзбекстан Республикасы Олий Мажлисінің Заң шығару палатасының депутаттары – Еңбек және әлеуметтік мәселелер комитетінің Төрайымы Мавлудахон Ходжаева мен Зафар Худайбердиев, Солтүстік Кипр Түрік Республикасы (СКТР) Ассамблеясы Төрағасының орынбасары Фазилет Өзденефе және СКТР Ассамблеясының мүшесі Ресмийе Джаналтай отырыста сөз сөйледі. Екі күндік іс-шара Түркі мемлекеттерінің парламентшілерін тиімді саясат пен тәжірибелер бойынша, оның ішінде қоғамдық өмірдің барлық салаларында әйелдердің мүмкіндіктерін кеңейтуге, шешім қабылдау процесінің барлық деңгейлерінде әйелдердің қатысуын және көшбасшылық үшін тең мүмкіндіктерді қамтамасыз етуге, әйелдер мен қыздардың құқықтарын қорғауға бағытталған ұлттық стратегиялар мен бағдарламаларды іске асыру, сондай-ақ Түркі мемлекеттеріндегі әйелдердің алдында тұрған проблемаларды шешу бойынша тәжірибе алмасу үшін жинады. Қатысушылар әйелдерге қатысты кемсітушілікті толығымен жою жөніндегі бірлескен парламенттік күш-жігердің маңыздылығын атап өтті. Кездесу ТҰҰЖ әйелдер мен ерлер үшін тең мүмкіндіктер комитетінің Төрайымы Чиғдем Ердоған Атабек пен Түркия Республикасының Отбасы және халыққа қызмет көрсету министрі Махинур Өздемир Гекташтың қорытынды сөздерімен аяқталды.